Gibasura sa gobiyerno sa Timor-Leste ang aplikasyon sa suspendidong si Negros Oriental Representative Arnolfo Teves Jr. alang sa political asylum, sumala sa Department of Foreign Affairs (DFA) sa Martes, Mayo 9, 2023.

Sa usa ka pamahayag, ang DFA niingon nga kini gikompirmar sa Ministry of Interior sa Timor-Leste.

“In accordance with the decision of the Timor-Leste Government, Representative Teves has been granted a period of five days to depart Timor-Leste,” sumala sa ahensiya.

“During this time, he also has the option to file an appeal regarding the decision,” dugang sa pamahayag.

Human makakuha og impormasyon nga si Teves nangita og asylum, ang Department of Justice (DOJ) nipadala og sulat nga nag-awhag sa DFA sa pagpahibalo sa ambassador sa Timor-Leste nga sila mihimo og “konkretong mga lakang” aron isipon si Teves nga usa ka terorista.

Kini taliwala sa iyang pagkalambigit isip giingong mastermind sa pagpatay kang Negros Oriental Governor Roel Degamo niadtong Marso 24, 2023.

Si Teves nagdumili sa pagpauli tungod sa mga pangangkon sa mga hulga sa iyang kinabuhi ug pamilya human ang iyang ngalan gilambigit sa insidente sa pagpatay apan gibalikbalik niya sa paglimod ang bisan unsang kalambigitan. (SunStar Philippines)