Tinuod ba kining naobserbahan sa daghang mga Sugboanon nga anaay duha ka dagkong mga pulitiko sa Sugbo nga nagbungol? Nagsugod kini sa dihang wa moapil ang babaye nga pulitiko sa kalingawan nga gipasiugdahan sa lalaking pulitiko. Sukad niadto nadiparahan na nga daw dili na sila magtabi bisan atol sa mga kalihukan diin gikinahanglan ang presensiya nilang duha.
Diha kadtoy resolusyon nga gipasiugdahan sa maong political leader apan wala mopirma ang lalaki nga pulitiko kauban sa kaatbang sa pulitika sa nagduso sa maong resolusyon.
Diha usay report nga sa usa ka forum daw wala hatagi og bili ang presensiya sa lider sa siyudad diin gihimo ang maong kalihukan.
Kon tinuod kini maora og matinuod kadtong akong gihisgutan dinhi nga posibleng magkaatbang sila sa umaabot nga eleksiyon. Ang mga tawo nahadlok sa epekto niini sa kaugmaran sa Sugbo kon dili na magkahiusa ang atong political leaders. Ang uban hinuon nagtuo nga maalegre ang piniliay sa Cebu kon magkabangga kining duha ka mga higante sa pulitika.
* * *
Unsa man kahay reaksiyon ni kanhi presidente Rodrigo Duterte sa pamahayag ni Presidente Bongbong Marcos sa Estados Unidos nga adunay kasaypanan ang war on drugs sa miaging administrasyon? Sukad sa panahon nga milingkod sa Malacanang si Marcos iya gayud nga gipanalipdan si Duterte sa kampanya niini batok sa illegal nga drugas. Dili man gani siya buot nga imbestigahon sa International Criminal Court (ICC) ang kalapasan sa Duterte administration sa tawhanong katungod.
Wa kita masayud unsay katarungan nga nakasaway man si Marcos sa gihimo ni Duterte. Tingali og naapeke lang siya sa pressure sa American public.
Apan ang ubang mga political observer nagtuo nga gituyo kadto ni Marcos aron hinayhinay nang matay-og ang ngalan sa mga Duterte nga makaapekto usab sa pagkatawo ni Bise Presidente Sara Duterte Carpio. Sugod na ba kini sa pagtuboy kang Senador Imee Marcos nga maoy mopuli kaniya sa Malacanang?
* * *
Mas maayo pa hinuon ang election pagka-mayor ug bise mayor sa (PUSO) Pundok Sugboanon sa mga magpundok sa mga kapihan sa SM City. Ang mga sakop sa maong pundok nga kanhi mga huwes, mga abogado, media, mga negosyante, consultants, retirees, ug kapin sa usa ka 100 ka mga sakop maghimo og eleksiyon karong Hunyo 12, 2023.(mannyrabacal1144@gmail.com)