PADAYON pang gisubay sa mga awtoridad ang motibo nga posibleng hinungdan sa pagpatay sa drayber sa motorsiklo sa wala mailhing suspek sa Purok Narafil, Barangay Magupising, BE Dujali, gabii niadtong Mayo 5, 2023.
Ang biktima giila nga si Fernando Tingson Toriaga, 56, minyo, single motorcycle drayber, ug molupyo sa Purok 2B, East Cabayangan sa nahisgutang lungsod.
Subay sa report, nasayran nga ang biktima napalgang nagbuy-od sa dalan uban sa iyang kolor itom nga Bajaj nga motor sa nahisgutang dapit diin nahitabo ang insidente.
Gibutyag nga una pa man napalgang patay ang biktima, mga estambay sa dapit nakadungog og buto sa armas ug sa dihang gisusi maoy nakit-an ang biktima nga nagbuy-od na sa sementadong dalan.
Ang biktima nakahiagom og samad pinusilan sa tuong bahin sa abaga nga maoy hinungdan sa iyang kamatayon.
Gilusad na ang hot pursuit operation sa kapulisan B.E. Dujali Municipal Police Station aron nga matumbok ug madakpan ang suspek nga nagpatay sa biktima.