Duha ka mga balay ang nangaguba nga naigo sa kusog nga bul-og sa tubig gikan sa nibuto nga dakong tubo nga nagsubay sa taytayan sa dalan Escario sa Barangay Kamputhaw, dakbayan sa Sugbo, alas 3:39 sa kaadlawon sa Huwebes, Mayo 11, 2023,
Dili mominos 1,000 ka panimalay ang apektado sa pagkabalda sa supply sa tubig, matod ni Minerva Gerodias, tigpamaba sa Metropolitan Cebu Water District (MCWD) nga nahinabi sa SunStar Cebu sa Huwebes, Mayo 11, 2023.
Gipasabot niya nga tungod kini sa kataas sa pressure sa tubig ug karaan na ang tubo.
Gibutyag ni Gerodias nga usa lang ka bahin sa Kamputhaw nga nahimutang sa daplin sa dalan North Escario ang naapektuhan sa suplay sa tubig.
Apan, dason niya, ang mga kasikbit nga dapit sama sa Barangay Busay, Nivel Hills ug Salinas Drive sa Barangay Lahug, ug ubang bahin sa dalan North Escario mahimong makasinati og ubos nga pressure sa tubig o nawad-an og suplay.
“Katong uban, mao tong dili pa kaayo kusog ang ilang pressure karon, kay dili man sad namo idiretso og release ang suplay,” pasabot ni Gerodias sa SunStar Cebu.
“Ang uban, dili stable ang pressure nila karon, kay dili man ta direktang i-release ang supply (tungod sa repair works),” dason niya.
Sa laing pamahayag sa Huwebes sa hapon, ang MCWD nisaad nga tapuson ang pag-ayo sa nabuslot nga tubo sulod sa usa ka adlaw aron mabalik ang serbisyo sa tubig sa mga apektadong lugar.
BALAY NAGUBA
Sa dihang gipangutana kon aduna bay mga balay nga naguba, si Gerodias mitubag, “Sa akong hunahuna adunay gikataho nga duha ka mga balay nga apektado, apan ang among grupo anaa pa sa site.”
Dugang pa niya nga nagpadayon pa ang dugang imbestigasyon sa MCWD aron masayran kon aduna bay laing mga balay nga apektado.
Sa ilang pag-una sa pagmintinar ug pag-ayo sa nabuak nga tubo, ilang gilauman nga mahuman sulod sa usa ka adlaw. Ila usab nga mahibaw-an ang kinatibuk-ang gidaghanon sa tubig nga nawala.
Gikompirmar ni Gerodias nga nadawat sa ilang call center ang taho kalabot sa insidente sa alas 3:39 sa kaadlawon sa Huwebes, Mayo 11.
Nahitabo kini human ilang gipadaghan ang suplay sa tubig sa Kamputhaw gikan sa Lusaran bulk water project, matod ni Gerodias.
“Kini man gud ang linya dinha sa Kamputhaw, wala na siya naanad og taas nga pressure kay for so long, kuwang man ta og supply dinha sa Kamputhaw nga area — common knowledge na siya sa mga tawo nga nagpuyo dinha,” pasabot ni Gerodias.
“Kato gihinay-hinay to namo og sulod sa system ang supply from Lusaran since Monday, and then okay ra siya past few days until [pagkaadlawon] nibigay na siya nga portion nga tubo,” dugang niya.
KOMPENSASYON
Gipasalig ni Gerodias nga makiangayon nga kompensasyon ug hinabang ang ihatag sa mga apektadong residente, partikular na sa mga balay nga nangaguba.
Matod niya nga adunay usa ka konsultasyon tali sa legal nga grupo ug sa mga residente, nga unahon human sa pag-ayo, aron sila makahukom sa kantidad nga ilang itanyag.