KINSE anyos nga lalaki gitudlong usa sa mga suspek nagtulis sa negusyante’g isda sa Purok 8, Barangay Buclad, Asuncion alas 4:50 sa buntag, Huwebes, Mayo 11, 2023.
Nasayran nga ang biktima nga si Sergio Pamat Baquiran, Jr., 42, minyo, fish vendor ug molupyo sa Purok 8, Aboid, Barangay Pag-asa, Kapalong naglabigar sa dalan sakay sa gimanehong motorsiklo padulong sa siyudad sa Tagum aron mangompra og isda nga ibaligya.
Apan pag-abot sa Purok 8, Barangay Buclad, laing motorsiklo nga dunay duha ka mga lalaki nga nag-angkasay namatikdan nga nagsunod kaniya. Ug sa dihang nakaduol na kaniya, gibunalan og puthaw sa nag-angkas nga suspek ang helmet sa biktima.
Tungod niini, nisarasay ang dagan sa motor nga gimaneho sa biktima hangtud nga nabalintong sa dalan.
Sa dihang natumba na ang biktima, giduol siya sa mga suspek ug pugsanong gikuha ang kuwarta nga balor og P9,600 nga dala niini dayong mikagiw palayo sa wala masayring direksiyon.
Subay sa gihimong imbestigasyon, positibong giila sa biktima nga ang usa sa mga suspek mao ang 15-anyos nga nagpuyo sa Purok 8, Brgy. Canatan, Asuncion.
Sa pagsuwat ning balita, gipangita na sa kapulisan sa Asuncion Municipal Police Station aron nga luwason ang suspek ug ang kuban niini.