Sa panahon karon, ingon sa ang tanan kanunay nga nagdali. Maorag kanunay gigukod, sa trabaho man o negusyo. Mao nang daghan og init ang ulo kay na stress sa pagsige og dali.
Sa kinabuhi, imong matandi ang biseklita kay kini, may kalabutan sa balanse. Matumba ka, mobangon, mosikad og balik. Ingon pang uncle Albert Einstein, “ang kinabuhi sama og nagsakay ka sa biseklita.
Aron kanunay kang mabalanse, kinahanglan mosikad ka.” Apan sa gihapon ayaw pagdali nga ingon sa gigukod ka kanunay kay sa imong mga agianan, naay maanindot nga di mo lang damhon, mahingangha ka sa kaanindot.
Makalingaw ang biseklita kon ang imong tuyo mao ang paglingawlingaw pinaagi sa pagtan-aw sa mga dapit nga imong maagian ug pakighugoyhugoy sa ubang mga tawo nga sama nimo og hilig, ang pagbiseklita.
Daghan ko og nadiskobrehang maanindot nga mga dapit tungod sa pagbiseklita. Mga dapit nga bisan tuod maisip nga maabot ra, apan wa nako maadto hangtod nga nag mountain biking ko.
Years later, labina atol sa pandemic, ang mga dapit nga amoang kanunay maagian samtang magsikad, nadiskobrehan sa daghang mga tawo nga nangatkat sa bukid.
MANIPIS
Pipila na ka mga higayon nga among gisaka ang karsada sa Manipis sa City of Talisay. Ang gipasigarbo ni Mayor Gerard Anthony “Samsam” Gullas nga ‘sleeping dinosaur’ dugay na namong sige og sud-ong matag higayon nga moagi mi sa Manipis.
Maanindot ang talan-awon sa mao nga karsada tungod kay nagbawod ang kabukiran ug sa ubos naa ang lapad nga Mananga River.
So, di ikahibung nga dihang nilugak na ang mga lockdown tungod sa Covid-19, daghan ang nangadani nga mga siklista sa pagduaw ug pagtambay sa dapit. Mao ni ang hinungdan nga daghang mga kan-anan ug uban pa nga nanurok sama og uhong.
Bisan gani magpadung ka pa sa Manipis, maanindot na man ang mga talan-awon samtang magsubay ka sa lapad nga karsada nga nag-umbaw sa Mananga.
Gisuwayan na namo og hunong kini nga stretch sa karsada, nindot ang hangin bisan tuod bantang ka usahay sa init.
Gikan sa Manipis, mangliko mi lahos sa Brgy. Sinsin, Sudlon 1 ug 2 dayon sa sityo Cantipla ngadto sa Transcentral Highway.
Ning mga dapita, mahingangha ka sa kaanindot sa mga talan-awon.
ENJOY THE MOMENT
Sa mga rota nga among naagian, basta nindot gani ang spot, di kapugngan nga duna gyuy mamahuway. Busa,mapugos ka sab sa pagsunod. Bitaw, unsa may imong dalian nga ang imong tuyo mao man ang paglingawlingaw, pagdiskobre og mga dapit?
Gawas kon nangandam ka alang sa imong apilan nga lumba ug endurance race kay mag-apas ka og oras aron pag-anad sa imong kaugalingon.
Kon medyo layo ang akong adtuon, di ko magdali, labina kon maanindot ang mga talan-awon. Apan kon magpasingot lang ko, nganong moadto pa man ko og layo nga ang gikinahanglan sa lawas mao ra man ang igo-igo nga pagpasingot, di palab-anan?
Ang importante, mag-enjoy busa di magdali.