Daw sayop nga impormasyon ang nahidangat ngadto sa buhatan sa Department of Justice (DOJ) kalabot sa pagpasar og ordinansa sa Hunta Probinsyal nga kinahanglang mananghid ug mosumiter ang national government agencies sa Kapitolyo una mopatuman og programa o proyekto.
Kini maoy pamahayag ni Cebu Governor Gwendolyn Garcia kalabot sa giluwatang resolusyon ni Secretary Jesus Crispin Remulla kabahin sa opinion niini sa Ordinance No. 2023-02 sa Lalawigan.
Matod ni Garcia nga hinuon usa lang kini ka opinyon ug angay usab nga respetuhon.
Apan nagtuo ang gobernador nga adunay sayop sa nadawat nga impormasyon sa kalihim.
“It is an opinion written, with all due respect, by the Honorable Secretary Remulla way back April 24th, when there was little or inaccurate information that reached the DOJ. In fact, it starts from the wrong premise. That the ordinance was caused by our conflict with the BAI,” matod ni Garcia sa Mayo 13, 2023.
Subling giklaro ni Garcia nga ang napasar nga ordinansa sa Probinsya wala magtumbok alang lang sa Bureau of Animal Industry (BAI) apan ang maong balaod alang sa tanang nasudnong ahensya sa gobiyerno.
Sa nasayran nagkabangi sa baruganan ang Kapitolyo ug BAI ilabi na sa culling policy sa ahensya nga gipatuman alang sa mga hog raiser sa siyudad sa Carcar gumikan sa gituohang African Swine Fever (ASF).
Sukwahi sa nadawat nga impormasyon sa Secretary, wa nipasaka og kaso ang Kapitolyo batok sa Department of Agriculture (DA), apan sa BAI lamang.
“And also, that we filed criminal and administrative charges against the Department of Agriculture and the Bureau of Animal Industry. That isn’t so. The complaint is against the BAI alone,” dugang niya.
Una nang giklaro ni Garcia nga ang pagpasar sa Hunta Probinsyal sa maong balaod tungod sa wala magkatumong nga pamaagi sa pagpatuman sa mga proyekto sa Probinsya.
Gidugang niya nga siya mopatawag og press conference sa Lunes, Mayo 15, 2023 aron klaruhon ang maong hisgutanan.