Magtinagakay ning Lunes, Mayo 15, 2023, alas 3:30 sa kaadlawon (PH time), ang host Boston Celtics ug Philadelphia 76ers sa deciding Game 7 sa ilang Eastern Conference semi-finals series sa National Basketball Association (NBA).
Ang modaog ning sangkaa mao ang makigharong sa Miami Heat alang sa conference finals.
Mao kini ang labing unang higayon nga giyahan ni Boston rookie coach Joe Mazzulla ang Celtics sa usa ka deciding Game 7.
Apan bisan niini, masaligon si Mazzula nga molampos siya ning maong malisod nga tahas.
“We know how to win easy and we know how to battle to the death,” masaligong asoy ni Mazzulla.
“Definitely looking forward to Game 7.”
Ning maong playoffs, mao pa lang kini nga series nga niabot og Game 7.
Ang Celtics nakaikyas sa kuhit sa panamilit pinaagi sa pagposte og 95-86 nga kadaugan sa ilang pag-asdang sa balwarte sa 76ers sa Game 6 niadtong Mayo 12, 2023.
Gilaumang adunay adjustments nga himuon ang 76ers ning higayuna.
“We know what we have to do,” matod sa labing pambato sa 76ers nga si MVP Joel Embiid.
“It’s going to be fun. Game 7. That’s what we play, for these types of games.”
Ang Celtics miawhag sa ilang mga sumosunod nga suportahan sila og maayo ning maong misyon aron makakuha sila og dugang kadasig.
“Celtics fans, they love to call us out, right? So I’m gonna call you guys out this time,” matod sa usa sa mga pambato sa Celtics nga si Jaylen Brown.
“Energy in the Garden has been OK at best all playoffs. I need you to be up, I need you to come with the energy, because we’re gonna need every bit of it. So I’m calling you guys out. Let’s make sure the Garden is ready to go.”
Sa kasaysayan, ang Celtics adunay 26-9 nga rekord sa Game 7 nga mga duwa samtang ang 76ers adunay 6-11.
Nagkinahanglan gyud ang Celtics og suporta sa ilang mga sumosunod hilabi na kay dili maayo ang ilang kasinatian sa mismong ilang balwarte nga mao ang TD Garden.
Sa nangagi nilang home games ning maong playoffs, ang Celtics aduna ra’y 7-9 nga rekord. / AP