Sa matag higayon nga umaabot ang huwaw, atong madungog ang mga tambag ug sugyot ingon man mga pasiaw bahin sa pagdaginot sa tubig. Sama niadtong bana nga nasakpan sa asawa nga nagdungan og kaligo sa iyang katabang. Simple kaayo ang rason – nagdaginot sa tubig.
Sa usa ka lugar nga nagnihit ang tubig, ang ilang mayor nisugyot nga ang mga tawo modungan sa pagpangihi inig shower aron pagdaginot sa tubig nga i-flush sa inuduro. Apan nidako na hinuon ang konsumo sa tubig kay kon kaupat mangihi sa usa ka adlaw, kaupat man sab mag-shower.
Ang labing pait kon wa gyuy tubig nga moagas sa gripo. Sama sa mokabat sa 1,000 ka mga panimalay nga nawad-an sa supply sa tubig sa dihang nibuto ang dakong tubo sa tubig nga nagsubay sa taytayan sa dalan Escario, Barangay Kamputhaw, dakbayan sa Sugbo niadtong kaadlawon sa Huwebes, Mayo 11, 2023.
* * *
Mahinungdanon ang tubig sa inadlaw nga kinabuhi. Gani ang mga karaang sibilisasyon, niturok ug nilipang palibot sa mga dagkong tinubdan sa tubig sama sa Nile River sa Egypt ug sa Mekong River nga nitadlas sa China, Myanmar, Thailand, Laos, Cambodia ug Vietnam.
Kon mobaha unya moawas ang tubig sa sapa, peligro sa mga nanagpuyo sa daplin sa mga sapa ilabi na sa siyudad sa Sugbo nga gustong ipahiklin ni Cebu City Mayor Mike Rama.
Maayo gani nga duha ra ka mga balay ang nangaguba sa dihang naigo sa kusog nga bul-og sa tubig gikan sa nibuto nga dakong tubo sa dalan Escario. Ang Metropolitan Cebu Water District (MCWD) nga maoy tag-iya sa tubo sa tubig nga nibuto mao nay moatiman sa mga balay nga naguba.
* * *
Sa reporter pa ko kaniadto sa radio station DYRC, among itaho ngadto sa MCWD ang mga leaking pipes, mga tubo nga nitulo ug nagsirit ang tubig. Pero karon pa ko kadungog nga dunay tubo sa MCWD nga nibuto.
Si Minerva Gerodias, tigpamaba sa MCWD, miingon nga ang hinungdan sa pagbuto mao ang kataas sa pressure sa tubig ug karaan na ang tubo. Nahitabo kini, matod niya, human ilang gipadaghan ang supply sa tubig sa Kamputhaw gikan sa Lusaran bulk water project.
Wa diay maanad ang karaang linya sa tubig sa Kamputhaw sa taas nga pressure sa tubig, matod ni Gerodias. Labi pa tingaling wa maanad sa taas nga pressure sa tubig ang mga konsumidor sa maong dapit.