Tukma nga 160 ka tuig sukad nahimong lungsod ang San Remigio, sa unang higayon makabaton na og public plaza ang lungsod.
Kini ang gibutyag ni San Remigio Mayor Atty. Alfonso Pestolante isip usa ka paagi sa pagpreserbar sa ilang kabilin ug pagdani sa daghang mga negosyante nga mohimo og pamuhunan sulod sa lokalidad.
“For the longest time, only by this time we will be having our public plaza,” matod ni Pestolante sa pakighinabi sa SunStar Cebu sa Martes, Mayo 9, 2023.
Ang mayoriya sa mga Sugbuanon, sumala pa niya, nasayod nga ang San Remigio lang, sa 44 ka lungsod ug siyam ka siyudad sa Isla sa Sugbo, ang walay public plaza sukad natukod niadtong 1863.
“The big project that my administration will be undertaking right now is the realization of the most-awaited, very long, overdue realization of our public plaza,” matod ni Pestolante.
Si Pestolante niingon nga gusto niya nga maghimo og lugar diin ang mga lokal, labi na ang mga bata ug senior citizens, mahimong magtapok sa katapusan sa semana ilabi na sa Dominggo.
“It is a necessary landmark every local government unit should have, so that is why I want it realized,” dugang niya.
Nagtuo siya nga samtang kini maghiusa sa komunidad, ang mga negosyo mahimo’g moturok sa lugar.
Ang public plaza mahimutang sa likod nga bahin sa Artemio Masbate Sports Complex sa Barangay Poblacion, diin ipahigayon ang grand ritual showdown sa Lapyahan Festival karong Martes, Mayo 16, 2023.
Bahin sa petsa sa pagkompleto ug budget nga gigahin alang sa kalamboan, ang mga opisyal sa munisipyo nagpadayon pa sa paghisgot aron mahuman ang proyekto. Bisan pa, gituyo nila nga makompleto kini sa labing madali, nga adunay giplano nga petsa sa pagsugod sa ulahing bahin ning tuiga.
COMMERCIAL CENTER
Gawas sa public plaza, plano sa kadagkoan sa lungsod nga magtukod og trading center ug bag-ong educational institution isip kabahin sa ilang estratehiya sa pagtukod sa bag-ong commercial hub sa lungsod sa Barangay Poblacion.
Si Pestolante niingon nga samtang anaa pa sa sayong bahin ang katumanan sa public plaza, sa higayon nga matukod na, iya nang napanglantawan nga magtukod og bag-ong merkado publiko.
“We will be also establishing our new public market it will be, maybe, just adjacent to each other [to the public plaza],” dason niya samtang nagplano usab sa pagtukod og college campus sa ilang dapit.
Iyang giangkon nga bisan og aduna nay extension campus sa Barangay Tambongon ang Cebu Technological University (CTU) Daanbatayan, iyang girason nga medyo layo kini sa siyudad sa Poblacion.
“I would prefer to give us full development to our commercial center, it is wiser to see a college institution. Seeing college students roaming around, it will give beauty to the place,” dugang niya.
Usa ka 23-anyos nga residente nga si Florence Faith Tamboboy niingon nga iyang dawaton ang katukoran sa bag-ong college campus sa Poblacion, tungod kay kini maka-cater og daghang mga estudyante tungod kay kini ang sentro sa lungsod.
“The current campus we have is quite far for other students. The transportation is really a problem for some, especially for students who are taking night classes,” matod ni Tamboboy.
Ang San Remigio ikatulo nga klaseng munisipalidad nahimutang sa amihanan-kasadpang bahin sa lalawigan sa Sugbo nga adunay gilay-on nga 108 ka kilometro gikan sa Cebu City.
Sa 2020 census gikan sa Philippine Statistics Office, adunay mga 65,744 ka mga tawo ang nanimuyo sa sa lungsod ug nabahin ngadto sa 27 ka barangay. (KJF)