Kasamtangan nga gioktaba ni Cebu Governor Gwendolyn Garcia ang implementasyon sa Provincial Ordinance 2023-02 samtang nagpadayon pa ang konsultasyon sa tanang mga ahensya sa gobiyerno alang sa implementing rules and regulations (IRR) sa maong ordinansa.
Kini maoy giklaro ni Cebu Governor Gwendolyn Garcia atol sa pakighinabi sa mga tigbalita sa Lunes, Mayo 15, 2023.
“...But as I stated in that assembly of all the national government agencies and GOCCs as chief executive, I shall defer implementing this ordinance until we shall have come up with a doable, understandable, sensible, logical implementing rules and regulations,” matod ni Garcia.
“These series of consultations begin this afternoon together with DPWH. We decided to start with DPWH,” dugang niya.
Ang Provincial Ordinance 2023-02 sa Probinsiya sa Sugbo nag-require sa national government agencies nga mo coordinate usa o mangayo og approval sa Probinsiya sa Sugbo sa dili pa mopatuman og mga programa ug proyekto sa lalawigan.
Gipatawag ni Garcia og tigom ang mga nasudnong ahensya sa Abril 26 ug Mayo 3 aron mahisgutan ang mga lagda nga ilatid sa ordinansa una kini ipatuman.
“...We always reach out so we may listen to them because, we have no exclusivity of knowledge much less experience in each of their respective fields and their inputs will be very very valuable in coming up with a thoroughly distilled consensus that would work for both our constituents and for the government agencies,” matod ni Garcia.
Kini agi’g dugang pagtubag sa opinyon ni Department of Justice Secretary Jesus Remulla kabahin sa gipasar nga ordinansa sa Hunta Probinsyal.
Base sa unom ka pahina nga sulat sa DOJ ngadto kang Senior Undersecretary Elaine Masukat sa Presidential Management Staff, ang DOJ niingon nga wa kinahanglana ang approval sa Probinsiya sa Sugbo sa Bureau of Animal Industry (BAI) sa pagpatuman niini og polisiya kalabot sa pagkontrolar sa African Swine Fever (ASF).
Dugang niini nga mahulog nga ang ordinansa sa Probinsiya resulta sa panagbangi niini tali sa BAI tungod sa pagdumala sa ASF sa lalawigan.
Si Atty. Rory Jon Sepulveda, Capitol legal consultant, nagkanayon nga wala masayop ang Kapitolyo sa lakang niini gumikan sa giingong maayong tumong nganong nahimo ang maong balaod.
Gipasabot niya nga bisan og gi-welcome sa Kapitolyo ang nagkadaiyang mga opinion, gusto niining balikon nga ang paggama sa ordinansa dili tungod sa kasungian sa kagamhanan tali sa BAI, apan tungod sa tinguha sa Kapitolyo nga mahiusa ug mahan-ay ang lakang sa tanang mga ahensya kon may ipatuman nga proyekto o programa sa hurisdiksyon sa lalawigan sa Sugbo.
Iyang gihisgutan ang Local Government Code, sa Section 25.b niini nga nagkanayon nga ang “National agencies and offices with project implementation functions shall coordinate with one another and with the local government units concerned in the discharge of these functions.”
Giklaro usab niya nga wala mopatuman sa federal government ang Kapitolyo apan nagsubay gihapon sa unitary form sa kagamhanan.
Hinuon nagtuo ang gobernador nga kon nahibawo lamang si Remulla sa tinuod nga tumong sa Kapitolyo, mas masabtan niini nga way tumong nga mabahin-bahin ug magkatibulaag ang relasyon sa mga ahensya sa gobiyerno tali sa mga lokal nga kagamhanan.