Sugdan na ning Miyerkules, Mayo 17, 2023 sa alas 8:30 sa buntag (PH time), ang gikahinamang panagkrus sa dalas sa host Denver Nuggets ug Los Angeles Lakers sa Western Conference finals series sa National Basketball Association (NBA).
Kon magpadayon ang maayong gipakitang duwa sa Nuggets sa season, aduna sila’y kahigayunan nga mapusgay ang gikahadlukang panagpares sa Lakers nga sila si LeBron James ug Anthony Davis
Gawas niini, aduna say kahigayunan ang Nuggets nga makalugnot gikan sa mangil-ad nilang kasinatian batok sa Lakers.
Sa kasaysayan, kini maoy ikapito pa lang nga higayon nga nag-abot sa usa ka playoffs series ang duha ka mga kampo ug ikaupat sa conference finals. Gipatigbabawan sa Lakers kining tanan nga mga engkuwentro.
Ning maong season, parehong naggunit og 2-2 nga rekord ang Nuggets ug Lakers sa upat nila ka mga engkuwentro unya ang nakapangangha, pulos linubnganay ang mga resulta.
Kon buot hunahanaon, balanse ang kompetisyon ning maong series. Hinuon naa sa Nuggets ang homecourt advantage.
Ang Nuggets adunay 40-7 nga rekord sa mga duwa nga gipahigayon sa ilang balwarte, nga maoy labing taas sa season. Wala sab sila sukad napilde sulod sa Ball Arena ning maong playoffs.
“Maybe one of the best home environments we have in the league,” matod ni Lakers first-year coach Darvin Ham.
“Their crowd is going to be on the edge of their seats, standing, stomping, screaming.”
Human sa ilang ensayo, dili gustong maghisgot si Denver coach Michael Malone sa 8-25 nga rekord sa Nuggets batok sa Lakers sa playoffs nga mga engkuwentro.
“Getting to the NBA Finals is all that matters,” batbat ni Malone.
Ang Nuggets, sama sa naandan, mosalig og maayo nila ni kanhi back-to-back MVP Nikola Jokic ug Jamal Murray aron iparang nila ni James ug Davis.
“Every game, every postseason, every matchup allows you to continue to grow as a franchise, as a team, and they’ve done that,” matod ni James kabahin sa kasamtangang puwersa sa Nuggets. (AP)