Bisan sa pagpasabot ni Cebu Governor Gwendolyn Garcia nga ang Provincial Ordinance (PO) 2023-02 wala gitumong sa Kapitolyo ngadto sa Bureau of Animal Industry (BAI), dili malikayan nga kini makutay sa isyu sa Afrcian swine fever (ASF) tungod sa pagpalabang sa ordinansa human sa naasoy nga bangi.
Sumala sa PO 2023-02, “..all National Government Agencies and Government-Owned or Controlled Corporations (GOCCs) that will be implementing national policies, programs and/or projects within the territorial jurisdiction of the Province of Cebu shall coordinate, consult, and involve the Province of Cebu ...”
Gipaklaro sa gobernador nga ang ordinansa, nipasar sa Hunta sa Lalawigan niadtong Abril 11, 2023, alang sa tanang nasudnong mga ahensiya. Gipatawag na niya sa tigom ang nasudnong mga ahensya niadtong sa Abril 26, Mayo 3 ug Mayo 15 aron pagpasabot sa ordinansa ug mahisgutan ang mga lagda nga ilatid sa balaod una kini ipatuman.
Apan luyo sa pagpasabot ni Garcia, nimugna kini og nagkalainlaing reaksiyon. Ang labing ulahi ug bug-at nga komentaryo gikan ni Department of Justice (DOJ) Secretary Jesus Remulla nga nihulagway sa naasoy nga ordinansa nga “The Province of Cebu is mistaken.”
Ug niadtong Lunes, Mayo 15, 2023, si Garcia nipahigayon og press conference aron pagtubag sa pamahayag ni Remulla ug gipahibalo usab nga gioktaba una ang implementasyon sa PO 2023-02 samtang nagpadayon ang konsultasyon alang sa implementing rules and regulations (IRR) sa ordinansa.
Si Atty. Rory Jon Sepulveda, Capitol legal consultant, nagkanayon nga wala masayop ang Kapitolyo sa naasoy nga lakang ug gihangop niya ang nagkadaiyang mga opinyon, lakip sa pagpasabot nga wala mopatuman sa pederalismo ang Kapitolyo.
Nagtuo ang gobernador nga kon makahibalo si Remulla sa tinuod nga tumong sa Kapitolyo, makasabot kini nga alang sa kahiusahan sa lokal nga kagamhanan ug nasudnong mga ahensiya alang sa malampusong proyekto, programa o kampanya.
Bug-at ang mga punto ni Garcia. Mas maayong mapaklaro usab ang balaod.