GIKLARO sa Department of Education (DepEd) Davao ang pagbalik sa modular system o blended learning nga gisugdan na og implementar sa ubang mga tulunghaan kay temporaryo lamang isip solusyon sa mga hangyo sa ubang mga tulunghaan tungod sa sobra nga kainit nga nasinatian ning kasamtangan.
Sumala ni DepEd-Davao Spokesperson Jenielito "Dodong" Atillo nga ang maong solusyon dili pareho sa blended learning kaniadtong aduna pa'y pandemya.
Giklaro usab niini nga temporaryong solusyon lamang ang maong blended learning.
Dugang sa opisyal nga magpasa lamang og letter of intent application ang mga tulunghaan nga buot mag-implementar sa maong blended learning.
"Mag-submit sila og letter of intent application didto sa ilang school's division superintendent and then naay grupo nga mo-assess and then eventually, kung okey, aprobahan" matud ni Atillo.
Ang maong blended learning mamahimo nga ma-apply sa ubang nga tulunghaan nga nakasinati og grabe nga kainit apan depende gihapon kini sa mga eskuwelahan nga magpasa sa letter of intent.
"Depende sa mag-apply. Depende sa magpadala og letter of intent kay kadtong mga principals gimandoan man sila nga i-assess gyud ang sitwasiyon sa mga tagsa-tagsa nila nga mga lugar,” dugang pa ni Atillo.
Samtang, ang mga lugar nga wala makasinati og grabe nga kainit sama sa Marilog District dili na angay nga magsuspende sa face-to-face nga klase.
"Naay mga areas dinhi sa Davao City nga bisan pa'g nagligiting na ang kainit pero didto sa laing dapit, nag-jacket pa ang mga tawo, sama sa Marilog, dili ta puwede mag-suspend diha sa in-person classes ug mag-adapt og modular scheme,” dugang pa ni Atillo.
Samtang sa interview sa Superbalita Davao sa usa ka inahan ug residente nga si Jannelle Llanes nga taga Padre Gomez Street ning dakbayan, alang kaniya mas maayo sa gyud nga ibalik sa modular learning kay di lang bata ang apektado sa sobra nga kainit.
Luoy sab kuno ang mga bata ug mga maestra nga gaantos sa kainit sa ilang mga classrooms tungod kay kulang og electric fan ug kulang sa proteksiyon sa kainit ang ilang mga classroom.
Delikado sab labi na sa kadtong mga bata nga naay gipangbati basin nga mo-grabe pa.
Dugang pa ni Atillo nga ang pangunang kabalaka sa Department of Education mao ang kaayohan sa mga estudyante.