Ang Kapitolyo nakakuha na og kaalyado sa pagpatuman sa Cebu Provincial Ordinance No. 2023-02 nga nagmando sa mga national government agency (NGA) ug Government Owned and Controlled Corporations (GOCC) nga mangayo og pagtugot sa mga local government unit (LGU) sa dili pa sila mopatuman sa mga programa ug proyekto gikan sa national government.
Kini human nipadangat sa ilang suporta ang mga opisyal sa Department of Public Works and Highways (DPWH) sa Cebu Province ug Region 7.
Si DPWH 7 Regional Director Ernesto Gregorio Jr., kinsa maoy nangulo sa tigom nga gipatawag ni Gobernador Gwendolyn Garcia, Mayo 15, nakadayeg sa direksyon sa Kapitolyo.
“Maganda ang approach nga ini-espouse ni Gobernador tungod kay holistic to ug dapat proper coordinated nga ang mga projects namo sa baba, dili na mag-usik-usik sa pundo sa gobyerno nga wala mahuman ang mga road projects,” sa Sugbo News, kutlo sa web-based news service sa Kapitolyo, sa gisulti ni Gregorio.
Ang ordinansa nakakuha sa nasudnong atensyon tungod kay nagmando kini sa mga NGA ug GOCC sa pagkonsulta sa Kapitolyo ug pag-uyon niini sa pagpatuman sa ilang mga programa ug proyekto sa probinsiya.
Ang Kapitolyo niuktaba una sa implementasyon sa maong ordinansa sanglit padayon pa silang nanguha og inputs alang sa Implementing Rules and Regulations (IRR) gikan sa mga NGA ug GOCC.
Si Garcia niklaro nga sayop ang nadawat nga kasayuran ni Justice Secretary Crispin Remulla, kinsa nagtuo nga naumol kini subay sa bangi sa Kapitolyo ug sa Bureau of Animal Industry gumikan sa ilang pagpamatay sa mga baboy sulod sa 500-meter radius bisan kon wala pa matapti sa African swine fever.
Ang gobernador niingon nga gi-draft na ang ordinansa bisan wala pa nibuto ang isyu sa ASF.
Una niini, si Garcia niingon nga ang kontrobersiya sa UN Avenue sa Mandaue City nga wala matiwas pagtrabaho ug gibasol sa mga tawo ang mga opisyal sa Kapitolyo bisan kon way labot ang Probinsya maoy nakaaghat.
Nitambong usab sa maong tigom si Dept. of the Interior and Local Government (DILG) Provincial Director Ian Kenneth Lucero ug representante sa Anti-Red Tape Authority.