Bike lane ordinance gipatuman; dakop na

Gipatuman sugod sa Huwebes, Mayo 18, 2023 sa Sugbo Bike Lanes Board ang bike lanes ordinance nga niadto pang 2014 napasar sa Cebu City Council.

Ang pagpatuman gihimo human sa kapin sa usa ka tuig nga pag-edukar ug pagpakatap og mga impormasyon kalabot sa mga probisyon ug ordinansa.

Sagad sa mga nasikop sa paglapas sa City Ordinance 2408 wa nagsul-ob og helmet nga nalatid isip usa sa mga rekisito sa ordinansa.

Sa pagsuwat ning taho, wa pa hinuon masayri kon pila ang nadakpan nga mga siklista sa mga checkpoint nga gibutang sa bike lanes enforcers sa Banawa ug N. Bacalso Avenue.

Gawas sa pagsul-ob og helmet, gimando usab ang pagtaud og blinkers sa biseklita alang sa night visibility o makita sa gabii ang nagsikad.

Ubos ning ordinansa, ang tanang mga siklista kinahanglan motuman sa mga lagda sa trapiko, sama og nagmaneho og de motor nga sakyanan.

Gikinahanglan usab nga mosubay sa bike lane ang mga siklista kon duna may nakabutang sa karsada nga gitadlasan.

Hinuon, nakaani usab og mga pagsaway sa mga netizen ang gibuhat sa enforcers.

Alang kanila mas maayong unahon ang paghawan sa mga nakababag sa bike lanes ingon man himuon kining luwas.

“Make the bike lanes clear and safe for the cyclists, first and foremost. There are potholes, uncovered diggings, and those slippery steel plates all over the city. It doesn’t take a genius to realize that going over these obstructions is risky, considering that we would likely swerve into vehicular traffic if we loose control,” reaksyon sa usa ka netizen.