Ang pagpatay kang Negros Oriental Governor Roel Degamo ug sa laing napulo ka mga dumadapig niini ang giimbestigar sa Senate Committee on Public Order and Dangerous Drugs nga pinangulohan ni Senador Ronald “Bato” dela Rosa.
Sa pagsugod sa hearing, ang tanang mga testigos ningtumbok kang 3rd District, Negros Oriental Arnolfo “Arnie” Alipit Teves ug sa iyang igsuon nga si kanhi gobernador sa Negros Oriental Pryde Henry sa mga dautang binuhatan nila sa maong lalawigan. Sila usab ang gidudahan nga mastermind sa pagpatay kang Degamo. Ang 3rd District gidumala sa mga Teves sud sa 36 ka tuig, sugod sa 1987. Mga apo sila ni anhing kongresista Herminio “Meniong” Teves. Ang ilang uyoan nga si Margarito “Gary” Teves nahimong finance secretary ni kanhi Presidente Gloria Macapagal Arroyo.
Si Calatrava, Negros Oriental Mayor Janice Vallega Degamo, asawa sa gipatay nga gobernador, ug ang iyang pag-umangkon si Siaton, Negros Oriental Mayor Cezanne Fritz Diaz nagdala og hapit 60 ka mga tawo sakay sa abyon nga C–130 sa Philippine Air Force aron maoy manulti atol sa Senate hearing pabor sa mga Degamo.
Apan gawas kanila diha usay mga tawo nga ningtambong sa maong hearing nga ningdapig sa mga Teves ug ningsaway sa binuhatan sa mga Degamo. Diha gani testigo nga miinsister nga si Mayor Diaz ug si Mayor Degamo mismo ang miunay sa pagpapatay kang Gov. Degamo.
Naglibog na ang ubang mga tawo kon kinsa gayud ang tinuod nga nagpapatay sa gobernador. Nasayran didto ang kadato ug kagamhanan sa mga Teves samtang dunay mga testigos nga mibulgar nga si Siaton Mayor Diaz adunay mahalong mga awtong Lamborghini ug Ferrari.
Nisaad si Sen. Bato dela Rosa nga maghimo siya og report sa mga testimonya atol sa Senate hearing. Wa usab niya kapugngi ang pag-ingon nga ang mga Teves ug mga Degamo pulos adunay kasal-anan nga nahimo.
Sumala ni Mario Puzo, “Behind every successful fortune there is a crime.”
* * *
Maayo nga gipadayon na usab sa Cebu City ang paghawan sa mga sidewalk gikan sa nagkalainlaing babag kun illegal structures. Kining maong pagpanglimpiyo gihimo na kaniadto sa dihang adunay kasugoan si Presidente Rodrigo Duterte sa paghawan sa tanang sidewalks ug ang pagbalik sa kadalanan ngadto sa katawhan. Diha kadtoy mga opisyal sa gobiyerno nga nasilotan tungod kay wala makatuman sa kasugoan. Apan human sa pipila ka buwan nakalimtan na usab kini. Maayo na lang kay nakahunahuna pagbalik si Cebu City Mayor Mike Rama sa paghimo na usab sa maong kampanya. (mannyrabacal1144@gmail.com)