Og sa tinamban nga pinulongan, daghang nasungag niining panagparang tali sa Miami Heat ug Boston Celtics sa Eastern Conference finals.
Kini gumikan kay grabi ka inilog ang Boston (no.2) batok sa Miami (no. 8) ning tapara nga bisan pa niadtong wa pa kasugdi ang Game One sa ilang conference finals.
Pero human pakurati sa Heat ang Celtics sa Game One, 123-116, giusban na usab kini sa Game 2 kagahapon, 111-105.
Ang nakapait kay diha pa gyud kini mahitabo sa kaugalingong korte sa Boston nga mao ang TD Garden. Unsa pa kaha kon kini adto na sa nataran sa Miami nga mao ang American Airlines Arena?
Sa gihapon, ang pangalan nga Jimmy Butler maoy misubaw sa kadaugan ug miaswat ngadto sa 2-0 nga bintaha sa ilang series.
Ang 33-anyos nga may 6-7 ang gitas-on mibahig og 27 puntos, walo ka rebounds ug unom ka assists.
Si Jason Tatum sa Boston nindot usab unta kaayo og napakita apan sa fourth quarter, sama sa nahitabo sa Game One, naglisod na usab siya sa depensa nga gilusad sa Celtics ug wa gyud kini nahimo sa field goal. Ang kuwatro punto sa fourth quarter diha ra niya mahagpat sa free throw line.
Ang kakuwang usab sa suporta sa ubang bench maoy usa sa mga rason sa ilang kapildihan.
Karon nga naapikihan na sila og duha ka duwa diha mismo sa ilang korte, ilang suwayan kon mahimo ba nila ang gihimo sa Heat nga moharos sa ilang duha ka duwa sa hawanan sa ilang kontra. Kini sugdan karong Lunes, ugma sa buntag (takna dinhi sa Pilipinas).
Sama usab sa Boston, ang kinaham ug gisaway usab sa kadaghanan nga mao ang Los Angeles Lakers gikaduhaan usab og pildi sa Denver Nuggets sa ilang kaugalingong Western Conference finals.
Ang nakadeperensiya lang, kay ang kaparutan sa Lakers didto mahitabo sa korte sa Denver diin wala pa makatilaw og kapildihan ang Nuggets ning nagpadayon nga playoffs.
Karong buntag mobawos og host ang Lakers sa Nuggets didto Crypto. com Arena diin sama sa Nuggets wala pa usab sila kaangkon og kapildihan sa nagpadayon nga plaoffs.
Ang Lakers nakahantok sa playoffs isip ikapito sa Western Conference batok sa no.1 seed nga Denver Nuggets.
Halos tanan nga mga NBA experts/analysts didto sa Estados Unidos ang nanagna nga pabor ang Boston ning ilang series karon pero sitwasyon nga naunhan sila og duha ka lakang sa Miami unya diha pa sa ilang korte kini nahitabo, mora og tungason na kaayo alang sa Celtics.
Sa Western, inilog gyud ang Nuggets kinsa 2-0 na karon sa series, pero dili pa gyud hingpit nga nasirhan ang paglaom niini gumikan kay motapon pa man sa ilang korte ang serye alang sa Games 3 and 4.
Kon magpadayon ang Lakers sa limpiyong pagprotehir sa ilang korte, mohayag-hayag og gamay ang ilang paglaom.
Pero og makuhaan sila og usa bisag usa lang kadaug sa Crypto. com Arena aw kuli na kaayo nila ang kampiyonato.
Ang Game 3 sa duha ka conference finals maoy sukdanan alang sa Boston ug sa Lakers kon makabangon pa ba kaha sila niining ilang naghingutas nga kahimtang. Kini sugdan natog paniid karong buntag.