Bisan hapit na matapos ang School Year 2022-2023, ang Professional Regulation Commission (PRC) niadtong Biyernes, Mayo 19, 2023, nagpahibalo sa umaabot nga pagsulod sa kapin sa 72,000 ka board passers sa listahan sa mga propesyonal nga magtutudlo sa nasod.
Base sa resulta sa March 2023 Licensure Examination for Professional Teachers, adunay 24,819 ka elementary teachers gikan sa 60,896 ka examinees (40.76 percent), ug 48,005 secondary teachers sa 102,272 examinees (46.94 percent) nga malampusong nakapasar.
“Of the 24,819 elementary teacher passers, 19,390 are first timers and 5,429 are repeaters,” sumala sa PRC.
“For the 48,005 secondary teachers, 39,890 passers are first timers and 8,115 are repeaters,” dugang sa PRC.
Ang ahensya miingon nga ang resulta sa eksaminasyon sa 25 ka examinees gipugngan alang sa kataposang pagdeterminar sa ilang mga tulubagon ubos sa mga lagda ug regulasyon nga nagdumala sa eksaminasyon sa lisensya.
Sa laing bahin, gipugngan ang resulta sa eksaminasyon sa laing unom ka examinees alang sa dugang validation sa ilang gisumite nga mga dokumento.
Gitambagan dayon sa PRC ang board passers nga magparehistro alang sa pag-isyu og professional identification card (ID) ug certificate of registration.
Ang mga kinahanglanon naglakip sa Notice of Admission (alang sa pag-ila lamang); gi-download nga natuman na ang Oath Form o Panunumpa ng Propesyonal; duha ka piraso sa passport-size nga mga hulagway (koloran og puti nga background ug kompleto nga name tag); duha ka set sa dokumentaryo nga mga selyo; ug usa ka piraso nga mubo nga brown nga sobre.
Ang PRC usab miingon nga ang malampuson nga examinees kinahanglang personal nga magparehistro ug mopirma sa Roster of Registered Professionals.
Ang mga petsa ug lugar alang sa oathtaking ceremonies sa bag-ong malampusong examinees ipahibalo unya, matod sa PRC. (HDT, SunStar Philippines)