Sa mga nasod nga gilangkuban sa mga isla, mobiyahe ang mga tawo pinaagi sa eroplano ug barko. Busa kinahanglan ang mga tugpahanan ug mga pantalan. Sa mga mugbo nga biyahe sa mga isla, ang mga pantalan maoy agian sa mas dali nga biyahe sa mga pasahero ug kargamento.
Mahitabo kini sa gitakdang pagsubo ug paglusad sa Pier 88 sa lungsod sa Liloan sa amihanang bahin sa Sugbo karong Sabado, Mayo 27, 2023. Sumala pa ni Liloan Mayor Aljew Frasco, mao kini ang labing unang smart port sa lalawigan sa Sugbo.
Ang maong kalihokan kabahin sa pagsaulog sa tinuig nga kapistahan sa Liloan. Ang hingpit nga operasyon sa Pier 88 gipaabot nga makapadali sa biyahe sa mga pasahero ug kargamento sa amihanang Sugbo. Hayan mapadali sab ang paghimo sa lungsod sa Liloan nga usa ka dakbayan.
Ang Pier 88 nahimutang sa Barangay Poblacion sa Liloan. Matod pa ni Cebu Fifth District Rep. Vincent Franco “Duke” Frasco, makaayo kini sa mga tawo nga mobiyahe gikan sa Liloan paingon sa laing mga lugar sa Metro Cebu, sa mga isla sa Camotes ug sa mga lalawigan sa Bohol ug Leyte.
Ang tulo ka ektaryang smart port makatabang sab sa pagpalugak sa kahuot sa trapiko sa Metro Cebu, ilabi na sa lungsod sa Consolacion ug siyudad sa Mandaue kay gikan sa Liloan, aduna nay alternatibong sea route paingon sa Mactan ug siyudad sa Sugbo.
Makapanglaktod na ang mga tawo sa amihanang Sugbo sa ilang inadlaw nga biyahe paingon sa trabaho sa mga siyudad sa Mandaue, Lapu-Lapu ug Cebu. Pipila ka shipping companies, sama sa Oceanjet ug Super Shuttle Roro, nagpakita og kasibot sa paggamit sa Pier 88.
Ang Pier 88, nga mobalor og kapin sa P1 bilyon, usa ka public-private partnership tali sa kagamhanan sa lungsod sa Liloan ug sa mga pribadong kompaniya nga Pier 88 Ventures Inc., Topline Group of Companies, Viking Land ug FL Port Management Corp. Ang Topline mao ang developer ug operator niini.
Ang mga dagko nga roll-on, roll-off (roro) nga barko sa Super Shuttle Ferry maoy sakyan sa mga pasahero ug kargahan sa mga kargamento ingon man mga trak ug bus paingon ug gikan sa Camotes agi sa lungsod sa Poro. Ang Vallacar Transit, operator sa Ceres buses, magbukas og bag-ong rota gikan sa Cebu mainland paingon sa Camotes luwan sa usa ka roro vessel.