Duna na'y "person of interest" ang pulis sa pinakabag-ong pagpamusil sa may Barangay R.Castillo, Agdao Distrit, Davao City nga naglambigit sa kanhi sundalo.
“Subay sa atong imbestigasyon, naa na'y person of interest nga gina-reveal ang pamilya,” tug-an ni PMaj. Antonio Luy, station commander sa Bajada Police Station sa Davao City Police Office (DCPO), atol sa paghinabi kaniya sa Davao City Disaster Radio, Mayo 19, 2023.
“Dili pa namo ma-divulge ang person of interest niani kay ang pamilya naa pa sa panahon nga dili pa gyud ready makiglingkod sa atoang press conference,” pagpasabot niya.
Niadtong Mayo 17, 2023, nahitabo ang pagpamusil sa Lakandula St., kanto sa Jerome Extension, Brgy. R. Castillo, Agdao District, Davao City alas 9:42 sa gabii. Ang biktima giila nga si Gerardo Sardan Katigbak, 36, minyo ug molupyo sa Mutual Homes, Buhangin, Davao City.
Gisulti ni Luy ang nagpadayon ang imbestigasyon ug kasamtangang giproseso nila ang pagkuha sa recorded nga closed-circuit television (CCTV) footage.
Base sa spot report nga gihatag sa Davao City Police Office, nakita ang biktima nga naa sulod sa iyang sari-sari store uban ang iyang kapuyo ug katabang una ang insidente.
Gisulti sa pulis nga usa ka wala mailhing lalaki - nagsul-ob og full-face helmet, gray jacket, maong pants – kalit nga mibutho ug nipusil sa biktima sa duol nga distansiya makatulo ka higayon tumong sa iyang ulo nga maoy hinungdan sa iyang hinanaling kamatayon.
Ang suspek daling nisibat gikan sa lugar human makasakay og “raider motorcycle” nga gidrayban sa laing tawo.
Sumala sa mga saksi, dunay duha pa ka laing lalaki uban nila nga nakasakay sa laing motorsiklo nga nagsilbing "lookout".
Dugang gisulti sa DCPO nga sa crime scene, narekober sa kapulisan ang tulo ka basiyo sa bala nga gituohang gikan sa kalibre .45 nga pistola. Naa na kini sa kustodiya sa Davao City Forensic Unit alang sa ballistics examination.
Gibutyag ni Luy nga ilang nasayran nga ang biktima gi-ambush na kaniadtong 2022 apan naluwas.
Sukad niadto, gisulti sa asawa ug live-in partner sa biktima kanunay nang nakadawat og hulga.
Gisuta pa sa DCPO ang motibo sa pagpatay sa biktima. Kasamtangan, mga pulis milusad na og “a manhunt dragnet operation for the possible identification and arrest of the suspects.”