Nagdilaab ang kainit sa host Miami Heat sa ilang pagsugba sa Boston Celtics, 128-102, sa Game 3 nga maoy naghatag kanila og dominanteng 3-0 nga labaw sa Eastern Conference finals series sa National Basketball Association (NBA) ning Lunes, Mayo 22, 2023 (PH time).
Human sa makutas nilang kadaugan sa nag-unang duha ka mga duwa sa best-of-seven series, si Miami coach Erik Spoelstra naglaom nga mas lisod nga kombati ang ilang sagubangon ning higayuna.
Puwerte niyang sayupa.
“That was a solid, mature, professional approach,” matod ni Spoelstra, kinsa nag-ung-ong na sa iyang ikaunom nga biyahe paingon sa NBA Finals.
“There’s a lot of pent-up stuff here and we’re getting closer, but we still have to finish this off.”
Gisugdan sa Heat ang duwa pinaagi sa 5-0 run gikan sa jumpshot ug three-point shot sa beteranong si Kevin Love.
Nailog sa Celtics ang labaw, 12-9, apan pagkahuman sa 1st quarter, nakaposte og 30-22 nga labaw ang Heat.
Human niini, kanunay na nagsaka ang labaw sa Heat hangtod nga niabot kini og 33 puntos, 89-56, sa hinapos nga bahin sa 3rd quarter.
Tataw nga mius-os og maayo ang abaga sa Celtics ning higayuna ug hinayhinay na nilang gidawat ang kapildihan.
Alang sa Heat, ang lungag sa ring daw sama ka dako sa kadagatan.
“The rim was as big as the ocean for everybody,” matod ni Heat center Bam Adebayo, kinsa niamot og 13 puntos sa kadaugan.
Gipangulohan ni Gabe Vincent ang Heat pinaagi sa iyang career-high 29 puntos, nidugang og 22 puntos si Duncan Robinson, nihatag og 18 puntos si Caleb Martin samtang nihatag og 16 puntos ang lider sa Heat nga si Jimmy Butler.
Sa habig sa Celtics, tanan nilang mga sinaligan pulos nagsalimoang.
Gipangulohan ni Jayson Tatum ang Celtics pinaagi lang sa iyang 14 puntos samtang ningtunol og 12 puntos matag usa sila si Jaylen Brown, Payton Pritchard ug Grant Williams.
“I just didn’t have them ready to play,” matod ni Boston coach Joe Mazzulla, kinsa giuwan og mga pagsaway tungod sa nahitabo sa Celtics.
“Whatever it was, whether it was the starting lineup or an adjustment, I have to get them in a better place, ready to play. That’s on me.”
Sa kasaysayan sa NBA, wala pa’y nakabangon gikan sa 0-3 nga pagkalubong sa series. (AP)