Dugang mga barko na unya ang mobiyahe sa mga isla sa Camotes gikan sa mainland Cebu. Manukad kini sa lungsod sa Liloan padung sa pantalan sa Poro, mga isla sa Camotes.

Fastcraft ang usa samtang ang dako nga roro ang usa ka barko nga magsugod og biyahe ka usa lang una matag adlaw padung sa Camotes. Basin sa sugod lang ni aron ilang maobserbahan kon okay ra ba ang rota, mabuhi ba ang kompaniya. Natural tan-awon una ni kay negusyo baya.

Apan dugay nang nagkinahanglan ang Camotes og dugang nga mga barko nga gidominar og maayo sa usa lang ka kompaniya. Tungod kay di kaayo dako ang mga barko, kon dunay gale warning, di makabiyahe. Usahay moabot og usa ka semana nga mahunong ang mga biyahe.

Mohunong intawon ang kinabuhi sa mga taga isla panahon sa tingdagko sa mga bawod. Apektado ang panginabuhian ug negusyo sa mga taga isla sa Camotes ug ingon sa nihunong ang oras sa dapit.

Gawas usab nga mas dako ang barko nga gamiton, mas duol na kini sa siyudad sa Sugbo diin sagad manukad ang mga turista nga gustong moduaw sa Camotes.

Ning pagpabukas ni Gobernador Gwendolyn Garcia og bag-ong rota ug mas dako nga barko ang pabiyahion, di na unya kini mahitabo. Managhan pa og maayo ang mga bisita ug negusyo.

Gikinahanglan ang pagpalambo sa transportasyon sa kadagatan sa isla nga gitinguha sa Kagamhanan sa Probinsya nga mapalambo ang turismo sama sa Bantayan Island.

Ang Bantayan Island dunay mga barko nga mobiyahe hapit kada oras. Mas hamugaway ug mas sayon ang pagsakay.

Sa Camotes, daghan ang nangreklamo sa serbisyo sa management sa barko. Apan giagwanta kay wa may mas maayong alternatibo nga kasakyan.

Ning bag-ong lakang ni Garcia, labing seguro nga molambo pa og maayo sa turismo sa isla. Mohatag kini og daghang mga oportunidad sa mga lumolupyo sa Camotes nga nahikawan sa mas maayong serbisyo sa transportasyon sa kadagatan.