Nakataak sa National Basketball Association (NBA) Finals sa labing unang higayon ang Denver Nuggets human nila nakompleto ang pagharos sa Western Conference finals series, 4-0, pinaagi sa pagbuntog sa host Los Angeles Lakers, 113-111, sa Game 4 ning Martes, Mayo 23, 2023 (PH time).
Gipangulohan ni kanhi back-to-back MVP Nikola Jokic ang kadaugan pinaagi sa iyang makasaysayon sab nga triple-double nga 30 puntos, 14 ka rebounds ug 13 ka assists, nga maoy iyang ikawalong nahimo sa playoffs.
Ang maong triple-double sa Serbian superstar maoy nakabuak sa rekord ni Wilt Chamberlain nga pito ka triple-doubles sa usa ka playoffs season nga naposte niadtong 1967.
“It’s incredible,” matod ni Jamal Murray, kinsa niamot og 25 puntos alang sa Nuggets.
“It’s a lot of fun. It’s surreal. We’re going to keep making history, that’s the thing. We’re going to keep that mindset.”
Nagmangtas unta ang lider sa Lakers nga si kanhi four-time MVP LeBron James, kinsa nimugna og 40 puntos diin 31 niini iyang nahimo sa nag-unang duha ka quarters nga maoy naghatag sa Lakers og 15 puntos nga labaw sa halftime, 73-58.
Apan kining tanan nasugakod sa Nuggets.
Hinayhinay nga ninggukod ang Nuggets hangtod nga nailog nila ang labaw sa labing unang higayon, 82-81, sa nahabiling 4:39 minutos sa 3rd quarter.
Human niini, wala na maglagyo ang duha ka mga kampo hangtod napupos ang oras.
Ang duha ka freethrows ni Lakers center Anthony Davis sa nahabiling 1:13 minutos maoy nakatabla sa duwa, 111-111.
Sa return play, gigamit ni Jokic ang iyang gidak-on ug midaro kini sa ilawom batok sa depensa ni Davis aron mugnaon ang nakapadaog nga puntos sa nahabiling 51 ka mga segundos.
“I think that’s why playoffs are so nice and so interesting, because you don’t care about how tired you are,” matod ni Jokic. “You don’t care about minutes, fouls, shots, percentage. You just want to win a game. Some plays today we weren’t playing good defense sometimes, (but) you can win it in every kind of possible way.”
Tungod sa hugot nga depensa sa Nuggets, nasipyat si James sa iyang jumpshot sa nahabiling 1.4 segundos nga mao unta ang makapugos og overtime.
Puntos matag usa:
Denver (113) - Jokic 30, Murray 25, Gordon 22, Porter 15, Caldwell-Pope 13, Brown 6, Green 2.
LA Lakers (111) - James 40, Davis 21, Reaves 17, Schroder 13, Hachimura 10, Russell 4, Thompson 4, Walker 2. (AP)