Diputado: ‘Nangita og kapanibaan’

Kon tangtangon gani ang usa ka tawo sa iyang posisyon, aduna gyod nay rason. Usa na niini kon nakasala, o kaha, way maayong gipakita nga buhat sa iyang kanhi posisyon, nagkabingkil ba kaha, ug uban pa.

Daghan ang posibleng hinungdan pero kon imo gyod nga tutukan, tangtangon lang ang usa ka tawo kon wa na siyay gamit sa maong posisyon ug ihatag na lang kini sa lain.

Karong bag-o pa lang, naukay ang nasod sa dihang gi-demote si kanhi Presidente ug Pampanga Representative Gloria Macapagal-Arroyo gikan sa pagka-senior deputy speaker, nahimo na lang nga deputy speaker.

Daghang rason, daghang mga hinungdan ang mitumaw pero human sa bayloay sa mga pulong, migawas nga dihay plano nga pag-usab o coup sa pamunoan sa House of Representatives ug gipasanginlan si GMA nga maoy utok sa maong plano.

Mismo si House Speaker Jose Martin Romualdez niangkon nga “nipped in the bud” o naudlot dayon ang maong plano. Tungod kay si GMA ra man ang na-demote, ug way lain, klaro na kaayo kon kinsa ang gipasabot ni Speaker Romualdez.

Kon tinuod ang estorya nga si GMA mao sab ang utok sa pagpalagpot ni kanhi Speaker Pantaleon Alvarez, karong panahona segurado nga nakatilaw na sab og kapait si GMA labi na kay wa gyoy bisan usa sa iyang mga kaalyado ang mitingog pabor kaniya.

Wa gyoy laing kongresman nga nisulti nga nasayop lang si Romualdez sa iyang pagtuo ug way kapasikaran ang gisulti nga plano nga coup. Makita dinhi nga nag-inusara lang si GMA sa maong plano ug dali ra kaayo nga niatras, ug mitago, ang iya untang mga kaalyado nga misanong unta sa iyang mga plano. Mao kini ehemplo sa giingon nga “the victor has many fathers, the loser is an orphan.”

* * *

Adunay usa ka tawo nga nanugilon mga pipila ka semana na ang nakalabay nga makuha na gyod niya ang usa ka posisyon sa gobiyerno tungod kay, matod pa niya, nangusog gyod si GMA mismo nga makuha niya ang maong posisyon. Tiaw bay taudtaod pod niyang paitoy-itoy ni GMA aron lang makuha ang kompyansa niini.

Apan karon bag-o pa lang, mingaw pas tirana ang iyang panagway tungod sa nahitabo ni GMA. Kay napapas na man sa gahom si GMA, sama sa napapas na sab ang iyang paglaom nga makuha ang maong posisyon.

Mao kini pait nga reyalidad, kon pinalit lang sa “political patronage” ang imong posisyon, dili gyod kini permanente.

* * *

Susama usab kini sa usa ka kanhi opisyal nga nawagtang na sa gahom kay napildi sa miaging piniliay. Tungod kay naanad na nga libre ang iyang byahe-byahe, libre ang mga sakyanan ug mga kauban nga mokuyog sa iyang mga lakaw apil na ang pagkaon, apil na ang pagdawat sa minilyon nga komisyon, nabag-ohan sa pagka-pildi sa miaging eleksyon.

Karong panahona, siya na ang mobayad sa iyang mga biyahe, siya na ang molihok tanan kay wa na man siyay masugo.

Mao kini hinungdan nga nagpaitoy-itoy intawon siya ni GMA kay gusto nga makakuha og taas-taas nga posisyon sa gobiyerno. Halos matag adlaw, tua magyampungad sa opisina ni GMA, magpasugo na lang bisan unsa basta lang mahaduol siya pirmi ni GMA.

Tuod man, naluoy si GMA ug gipasaligan nga tabangan.

Aguy, imbes nag-ung-ong na unta ang iyang pangalan sa posibling makakuha og posisyon, naunsang pagka-unsaa nga na-demote man si GMA.

“Huyhoy abaga intawon ug karong mga panahona, nangita na sab og kapanibaan, mora’g si Felimon.”