Kon ang pwersa na sa kinaiyahan ang magmangtas, way makasanta o di kapugngan. Moataki kini nga dili hingpit matagna, gawas sa pagbana-bana sa batid sa natad sa panahon. Apan gihatagan kita og pangutok sa Magbubuhat nga dili usab hingpit maulipon. Magplano og mga lakang nga makalikay o kaminosan ang epekto sa kinabuhi ug kabatangan kon dunay saktong pagpangadam.

Ug mapasalamaton kita sa siyensiya nga ilang mabasa o mabana-bana gamit ang labing ulahi nga teknolohiya ang lihok sa panahon nga maggiya sa atong pagpangandam. Nahisgotan nato kini tungod sa ulahing taho sa Philippine Atmospheric, Geophysical and Astronomical Services Administration (Pagasa) nga dunay posibling super bagyo.

Gibana-bana sa Pagasa nga mosulod sa Philippine Area of Responsibility (PAR) karong Biyernes, Mayo 26, o sa Sabado, Mayo 27, 2023. Dugang sa Pagasa, kini nagdala og hangin nga gikusgon nga 130 kph duol sa sentro ug huros nga moabot og 160 kph sa Martes. Nag-irog kini amihanan-kasadpan 15 kph gikan sa silangan sa Kabisay-an.

Daghan nang bagyo nga nangagi sa nasod o mismo niigo sa dapit. Dili ba mas grabe og distruso human sa bagyo mao kadtong wa mapangandami o gibaliwala lang sa katawhan? Busa madayon o dili ang pag-igo sa bagyo sa atong dapit,ibutang ang atong hunahuna sa hingpit nga pagpangandam. Yano o sama sa binata nga pasidaan sama sa pagpalig-on sa balay, paghipos og pagkaon, tubig nga mainom, tambal ug mga kagamitan sa emerhensiya.

Samtang motuo kita sa mando sa lokal nga Disaster Risk Reduction and Management Offices (DRRMOs) labina kon momando sa pagpamakwit. Gitukod sa kagamhanan ang DRRMOs alang sa pag-andam sa komunidad batok sa bisan unsang kalamidad ug paglusad og operasyon sa matag emerhensiya.

Sama sa gikaingon sa unahan nga wala kitay igong gahom batok sa lihok sa kinaiyahan apan dunay kitay lantip nga salabotan sa pagpangandam. Dili ba ulahi na ang pagmahay?

Labaw sa tanan, makanunayon ang pag-ampo nga malayo kita sa katalagman.