Editoryal: Kaya sa polis ang 5 minutos?

Editoryal: Kaya sa polis ang 5 minutos?

Mas midaghan ang mga pagpamusil sa dakbayan sa Sugbo ning unang lima ka mga buwan sa 2023 nga niabot og na og 30, apan sa 2022 duna lay 16. Busa, gusto ni Mayor Michael Rama nga palambuon ang response time sa kapulisan ngadto sa singko minutos na lang matag hitabo.

Tingali ang buot pasabot nga lima ka minutos sukad sa pagka alarma sa kapulisan diin ang nahitaboan ubos sa jurisdiction sa buhatan niini. Ingon pa ni Col. Ireneo Dalogdog, hepe sa kapulisan sa Cebu City, nga mahimo kaayo kini nila.

Apan lisod ni alang sa kapulisan kon way partisipasyon sa publiko ug barangays. Kon di dayon makapanawag og polis ang saksi sa usa ka krimen, mag-unsa man ang mubo nga response time?

Kon magkamubo ang response time, mas dako ang kahigayunan nga masakpan pa ang mga killer o shooter.

Makahatag usab kini og kahadlok sa mga magbuhat sa krimen tungod sa kadako sa posibilidad nga sila mailhan ug madakpan kay di pa kaayo sila makapalayo sa dapit nga nahitaboan.

Ikonsiderar usab ang kahimtang sa trapiko sa Metro Cebu, diin bisan ang mga ambulansya maglisod gani sa pag-agi sa adlawan, labina rush hours. Kani nga mga factor angay nga ikonsiderar sa pagtubag og alarma.

Lain usab nga ikonsiderar mao ang mga oras nga sagad nahitabo ang mga krimen, kadaghanan sa gabii. Kini hagit usab gihapon sa kapulisan. Sagad lugak na kaayo ang pagbantay sa lawom nang gabii mao nang dunay mga polis nga nakuhaan og video ug hulagway nga nangatulog.

Laing labing epektibong solusyon niini mao ang 24/7 nga pagpakatap og mga polis pinaagi sa mga outpost sa estratehikong mga dapit, labina sa mga barangay diin sagad nangahitabo ang mga krimen, mas duol, mas dali ang response time.

Ang kapulisan naa aning records sa mga krimen nga nahitabo sulod sa Cebu City ug mga dapit diin kini nahitabo, mga oras nga sagad kini gihimo. Kini maayo na kaayo nga giya sa kapulisan. Ang pagpalihok ni Dalogdog sa lima ka mga police station pinaagi sa pagpalig-on sa ilang deployment hayan resulta niini.

Kining gusto ni Rama dako nga hagit sa kapulisan. Gikinahanglan kini sa mayor tungod kay ang taas nga gidaghanon sa mga krimen di maayo alang sa negusyo. Di maayo alang sa iyang Singapore-like nga tumong. Kay kon maghisgot ka og Singapore, gamay o ubos ang gidaghanon sa mga krimen.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph