Gimandoan sa Department of the Interior and Local Government (DILG) ang tanang local government units (LGUs) nga hugot mopalihok sa Disaster Risk Reduction Management Offices (DRRMO) isip pagpangandam sa pagkuso-kuso sa super typhoon Mawar.
Giawhag sa DILG ang LGUs nga mag-monitor sa tanang weather advisories sa Philippine Atmospheric, Geophysical and Astronomical Services Administration (Pagasa) ug gamiton ang HazardHunterPH nga makamugna og timailhan nga mga taho sa pagtaas sa peligro sa ilang tagsa-tagsa ka hurisdiksyon.
Gimandoan niini ang DRRMOs sa pagpahigayon og pre-disaster risk assessments alang sa baha, flash floods, rain-induced landslides, debris flow ug kusog nga hangin, ug paghimo og information dissemination sa komunidad.
Si DILG Secretary Benhur Abalos Jr. niingon nga kini nga mga lakang nagtumong sa pagpamenos sa mga makalas atol sa pag-igo ni Mawar, nga sa pagkakaron anaa pa sa gawas sa Philippine area of responsibility (PAR).
Tawgon si Mawar nga Bagyong Betty sa higayon nga mosulod na kini sa PAR.
Samtang, ang Department of Social Welfare and Development (DSWD) niingon nga nangandam na usab sila sa posibleng epekto sa dautang panahon, partikular na sa mga rehiyon sa Ilocos ug Cagayan Valley.
Si DSWD Secretary Rex Gatchalian niingon nga aduna nay prepositioned nga mga pagkaon ug gamit sa nagkalainlaing dapit sa nasod isip pagpangandam sa bisan unsang mahitabo. (SunStar Philippines, Hulawgay gikan sa FB post ni Mayor Rajiv Enad sa Minglanilla, Cebu)