Lima ka mga polis nga nadestino sa Mambaling Police Station sa Cebu City Police Office (CCPO) gipasakaan og kaso tungod sa reklamo kalabot sa kidnapping, rape ug uban pa.
Gawas kanila, dunay usa ka sibilyan ug laing mga indibidwal nga padayon pang gipang-ila ug gipangita.
Ang National Bureau of Investigation (NBI) Central Visayas nipasaka og mga kasong kidnapping/serious illegal detention with rape, paglapas sa Comprehensive Dangerous Drugs Act of 2002 ug Conduct Prejuducial to the Best Interest of Service batok sa lima ka mga polis sa Mayo 9, 2023, subay sa nadawat niining sumbong sa usa ka 18 anyos nga babaye nga gitago sa ngalang Inday.
Ang gipasakaan og mga kaso mao sila si Police Corporals Johnrober Rebusa, Jeffrey Alabata, Keven Gilbuena ug Police Staff Sergeants Donald Balansag ug Joy Marie Alad-ad.
Apil sa gipasakaan og kaso mao ang usa ka “Luis,” giingong bata-bata sa mga polis, nga giingong ning-rape ug nipasuyop kaniya og shabu, ingon man John Does.
Ang kaso naduso na sa Office of the Ombudsman Visayas human nisumbong si Inday tungod sa giingong pagdagit, pagpugos sa pakighilawas ug pagpugos usab kaniya sa pagpagamit og ilegal nga drugas atol sa giingong anti-illegal drug operation sa Septiyembre 19-22, 2022.
Subay sa gipanumpaang pamahayag ni Inday, iyang gisaysay nga sa Septiyembre 19, 2022 sa alas 11 sa gabii sulod sa panimalay sa iyang barkada sa Bontores, Abunuhan, Barangay Basak San Nicolas, dakbayan sa Sugbo, nagsabot sila nga mag-inom.
Sa samang higayon, nakadungog sila og kagubot sa gawas sa balay ug nakita nila nga dunay mga lalaki nga ningpugos sa pagsulod sa panimalay.
Sa dihang nakasulod na ang grupo, dali nga ning-ikyas ang iyang mga kauban agi sa likod nga pultahan samtang siya nahabilin tungod sa tumang kahadlok.
“She was told by one of her captors that they would have shot her had she ran away,” matod sa sumbong.
Girekisa siya sa mga polis nga iyang giilang sila si Rebusa, Alabata, Gilbuena ug Balansag ug kay way nakuha nga drugas, gipugos siya sa pagpasul-ob og jacket ug tabunan ang iyang nawong og t-shirt.
Tungod sa iyang kahadlok, niuban siya sa grupo sa mga lalaki ug gipasakay sa karaan nga awto nga dunay plate number nga GAB 162.
‘GITANGGONG’
Sa ilang biyahe, naguba ang sakyanan hinungdan nga dunay laing sakyanan nga nikuha kaniya ug siya gidala sa usa ka duha ka andana nga apartment.
Sa maong apartment, siya giingong gipugos pagpatug-an kon kinsa ang mga ilegalista sa lugar.
Nipasangil siya nga gawas niini, gipugos siya sa pagpasuyop og ilegal nga drugas ug gipugos sa pakighilawas sa usa sa mga sakop sa grupo nga iyang giilang Luis.
Si Alad-ad, nga iyang nailhan nga sakop sa Mambaling Police Station kay higala kini sa usa niya ka kabanay, iyang nakit-an sa iyang paglili sa bentana sa apartment ug iyang gipangayoan og panabang apan wa magpakabana.
Tungod kay way ikatug-an si Inday kanila, sa Septiyembre 22, 2022, gibuhian siya ug gipakanaog sa may Kauswagan, Barangay Basak Pardo, dakbayan sa Sugbo.
Nagtuo si Inday nga mga polis ang nidagit kaniya tungod kay sila lang ang dunay katungod sa pag raid ug duna say mga dalang armas.
Sa pagsusi sa NBI 7 sa Mambaling Police Station ug Philippine Drug Enforcement Agency (PDEA 7), way record sa scheduled anti-illegal drug operation sa naasoyng dapit sa maong mga adlaw ug oras.
Si Mambaling Police Station chief Jonathan Beethoven Taneo nihatag og certification nga way anti-illegal drug operation nga gihimo ang iyang buhatan sa mao nga dapit ug mga petsa.
Bisan si PDEA Director Jigger Montallana niingon nga sa ilang Operations Report Monitoring and Information System (PORMIS) way record sa anti-illegal drug operation.
Subay niining pagpasaka og kaso, gipahibalo sa Police Regional Office (PRO 7) sa Mayo 24, 2023 nga gimando ni Regional Director, Police Brig. Gen. Anthony Aberin, ang pagparelibo sa maong mga polis.
Si Lt. Colonel Gerard Ace Pelare, tigpamaba ni Aberin, sa interbyu sa mga tigbalita sa Mayo 24, niingon nga ang mao nga polis mag-atubang og kasong administratiba.
“Ang among buhaton is the administrative aspect because the criminal aspect of of that particular incident was discussed by NBI 7. So kami sa PRO 7, we commit support by giving them information, by being transparent and making sure that an investigation which is impartial will be conducted regardless of who is involved,” pasabot ni Pelare.
“We assure our counterparts from the NBI and Ombudsman that we will be very transparent in PRO 7,” dugang ni Pelare.