Rabacal: Bag-ong political party
Ang usa ka grupo nga mitabang kang Presidente Ferdinand “Bongbong” Marcos (PBBM) buot nang magpa-accredit pagka-national political party. Ang Kilusan ng Nagkakaisang Pilipino (KNP) gipaabut nga mopadagan na og mga kandidato sa umaabut nga midterm election sa 2025.
Nakapaisa sa kilay sa mga tigpaniid sa politika ang maong kalihukan sa KNP kay nahitabo kini atol sa pag-demote kang kanhi Presidente Gloria Macapagal Arroyo ngadto na lang sa pagka-deputy speaker nga gisundan sa pag-resign ni Bise Presidente Sara Duterte Carpio pagka-chairperson sa Lakas – NUCD.
Ang gikataho nga nagpasakop sa KNP mao kadtong dagkong mga politiko sa nagkalainlaing partido poltikal apil na gikan sa dominant political party nga PDP – Laban. Ang mga politiko nibarog nga karon nga sakop na sila sa KNP, naputol na ang ilang relasyon sa ubang mga partido.
Inig-abut na sa piniliay pagka-presidente sa 2028, si kinsa may paluyohan niining maong partido? Ako nagtuo nga gilig-on kining maong pundok tungod ug alang sa kandidatura unya ni Senador Imee Marcos pagka-presidente. Dili sulagma lamang kining maong hitabo kay bisan sa akong ordinaryong pangagpas nga moabut gayud kining panahona.
Kinsa may labanan ni PBBM, si Arroyo o si House Speaker Martin Romualdez? Klaro kaayo nga kining gihimo niya kang Arroyo nga adunay go-signal ni PBBM. Dili man gud katuhoan nga magbuot-buot lang ang Speaker sa pagpakig-away kang GMA nga kanunay usab pakuyogon ni PBBM sa iyang mga biyahe.
Naporma na gayud ang akong gitagna kaniadto nga ang magkabangga sa pagka-presidente sa nasod sa umaabut nga eleksiyon mao si Sen. Imee Marcos versus Vice President Sara Duterte Carpio.
* * *
Grabe ang lunop sa Mabolo, Cebu City ug A. S. Fortuna St., Banilad, Mandaue City niadtong milabay nga Biyernes sa hapon. Nahitabo kini bisan sa paninguha sa mga opisyal sa duha ka mga siyudad nga dili kini mahitabo.
Ako nagtuo nga hangtod mapugngan nato ang tubig sa dagat nga mobabag sa tubig baha panahon sa tingtaub, dili gayud masulbad kining maong problema. Mas maayo nga butangan og ali ang bukana sa sapa padung sa dagat nga mahimong masirhan kon tingtaub dungan sa kusog nga uwan ug ibomba na lang kini paingon sa dagat. (mannyrabacal1144@gmail.com)