Ang Philippine National Police (PNP) nagpakusog sa ilang pagsumpo batok sa ilegal nga sugal, nga suportahan sa “one-strike and no take policy” sa mga sakop niini, matod sa hepe nga si General Benjamin Acorda Jr. sa Huwebes, Mayo 25, 2023.
Sa usa ka pamahayag, gipahinumdoman ni Acorda ang iyang mga sakop nga ang pagpabaya o wala pag-aksyon batok sa ilegal nga sugal moresulta sa dali nga pagkatangtang.
Matod niya nga ang mga police commander nga makit-an nga inefficient o kulang sa ilang mga paningkamot sa pagwagtang ug pagpahunong sa ilegal nga sugal sa ilang tagsa-tagsa ka mga dapit sa hurisdiksyon kinahanglang tangtangon sa ilang katungdanan ug pasakaan og administratiba ubos sa Doctrine of Command Responsibility.
Matod niya nga ang one-strike policy magamit sa mga opisyal usa ka buwan human sa ilang paglingkod sa katungdanan.
“We will not tolerate the existence of illegal gambling activities that prey on the most vulnerable members of our society. Together with PCSO, we will deploy all necessary resources and implement stringent measures to put an end to this menace,” matod ni Acorda.(Dili nato tugotan ang paglungtad sa mga kalihukan sa ilegal nga sugal nga mobiktima sa labing huyang nga mga miyembro sa atong katilingban. Kauban sa PCSO, atong ipakaylap ang tanang gikinahanglang mga kahinguhaan ug ipatuman ang hugot nga mga lakang aron mahunong kini nga hulga.)
“With this strong stance, the PNP aims to leave no room for leniency in eradicating the illegal gambling menace,” dugang niya. (Uban niining lig-on nga baruganan, tumong sa PNP nga dili magbilin og luna alang sa pagkahuyang sa pagwagtang sa hulga sa ilegal nga sugal.)
Kini human nipirma og alyansa si Acorda aron pakusgon ang nasudnong kampanya batok sa tanang matang sa ilegal nga sugal sa tibuok nasod uban sa Philippine Charity Sweepstakes Office (PCSO).
Sa pag-ila sa makadaot nga epekto niining ilegal nga mga kalihukan nga nagdaot sa moral sa publiko, si PCSO General Manager Mel Robles nihatag og gibug-aton nga ang mga operasyon sa ilegal nga sugal dako kaayo og epekto sa kita nga makuha sa PCSO, tungod kay ang kadaghanan sa mga kinitaan toa paingon sa mga bulsa sa mga operator sa ilegal nga sugal.
Giawhag ni Robles ang publiko sa pag-apil lamang sa mga dula nga gi-sanction sa PCSO sama sa Lotto ug small-town lottery, kay dili lang sila adunay kahigayonan nga makadaog og kulbahinam nga mga premyo, apan mahimo usab silang aktibong makatampo sa pundo sa mga programa sa kaayohan sa PCSO. (TPM sa SunStar Philippines)