Nabantayan sa kapulisan nga niuban kang Cebu City Mayor Michael Rama atol sa gihimong walkthrough sa Martes, Mayo 23, 2023, gikan sa dalan Gorordo sa Barangay Kamputhaw paingon sa Barangay Talamban, nga dunay mga tawo nga namuyo ilawom sa mga taytayan.
Matod ni Police Colonel Ireneo Dalogdog, hepe sa Cebu City Police Office (CCPO), nga angay kini nga badlungon ug sila papahawaon tungod kay nameligro ang ilang kinabuhi.
Nakahatag usab kini og kahugaw sa palibot sanglit didto na ilabay ang ilang mga hugaw ug basura, lakip na ang pag vandal sa mga pader o sementadong koral sa kadalanan nga nakahatag og dili maayong talan-awon.
Tungod niini, gisaad ni Dalogdog nga ila kining hatagan og pagtagad aron malimpyuhan ang mga sapa ug taytayan sa dakbayan.
Giangkon sa police official nga nagbalikbalik na kini nga problema tungod kay kon hinginlan ang mga namuyo ilawom sa taytayan, mobalik ra usab kini kon wala nay mga polis ug ubang mga ahensya sa gobiyerno.
BARANGAY
Gumikan niini, nanginahanglan sila sa abag sa barangay officials ug komunidad sa pagtabang sa tinguha sa pagkab-ot sa tumong sa Kagamhanan sa Dakbayan nga mahimong Singapore-like.
“Kami naningkamot pud mi nga makatabang sa mga programa sa local government unit. In fact naa mi weekly nga pagahimuon nga gitawag namo’g mural painting, kadtong mga vandalism nga makita among pintalan. Ang among area karon diri sa area sa Gorordo padulong sa may Harold’s Hotel,” matod ni Dalogdog.
Mosalmot ang ubang mga organisasyon ug sektor sa katilingban sama sa fraternities ug clubs nga susama og tumong nga mao ang pagtabang sa dakbayan.
Nakasaway, matod pa, ang mayor atol sa walkthrough nga dunay mga dalan nga gipanggamit na nila ang mga side walk, inay agianan sa mga tawo.
Adunay mga eskina nga nanimahong angso tungod kay bisan asa na lang mangihi ang mga tawo.