Duna unyay kuyog nga mga polis sa ilang pag-roving ang mga tanod sa pipila ka mga barangay sa Dakbayan sa Sugbo nga taas og gidaghanon sa mga krimen.
Ang mao nga mga personnel tipik sa 161 ka mga bag-ong mga polis gikan sa Regional Mobile Force Battalion (RMFB 7) nga ipangdestino sa Cebu City Police Office (CCPO) aron moabag sa paghatag sa seguridad sa dakbayan.
Sila dinhi gi-recruit sa Central Visayas apan pulos kini taga Ilo-ilo nga dinhi lang nasulod sa ilang training.
Ang pagdugang og police personnel sa CCPO gihangop ni Police Colonel Ireneo Dalogdog, hepe sa CCPO, tungod kay dako kini og tabang sa ilang police visibility patrol.
Sa 161 ka bagitong polis, 20 maoy ipakatap sa kabarangayan.
Matod ni Dalogdog nga ang dakbayan sa Sugbo adunay 80 ka barangay apan ilang ilhon kadtong mga barangay nga taas og crime volume.
Ilang abagan ang mga barangay tanod sa ilang pagpatrolya nga magsugod sa alas 8:00 sa gabii hangtod sa alas 8:00 sa buntag pagka ugma.
Ang ilang trabaho mao ra ang pagtuyok sa mga barangay nga dunay problema sa krimen nga mahitabo matag gabii aron mapakgang ang krimen sa maong mga barangay.
“Ang ilang buhaton mao ra gyud ang pagtuyok sa mga barangay nga taas ang mga incidents sa 8 focus crime uban nila ang mga barangay tanod,” matod ni Dalogdog.
Ang nahabiling 141 ka police ipang-apud-apod usab sa 11 ka police stations ug special unit sa CCPO.
Kasagaran sa mga barangay nga dunay taas ang krimen naa nahimutang sa urban barangays nga nagsikit ang kabalayan.