PATAY ang suspek sa kasong pagpanghimas og babaye human misukol sa kapulisan sa Digos City Police Station pasado alas 6 sa gabii, Mayo 24, 2023.
Sa report sa Digos City police, giila ang napatay nga suspetsado nga mao si Jovanie Caballero, 27-anyos, taga Barangay Dulangan, Digos City.
Nasayran nga samtang ang suspek gipailawom sa booking procedure sa kasong Acts of Lasciviousness in relation to Republic Act 7610, alegasyong kalit kining nangilog og pusil sa duty custodial officer nga si Police Corporal Hero Joseph Jacolina.
Nag-inilugay pa sa pusil ang suspek ug ang pulis hinungdan nga nakabuto kini ug nakuha ang atensiyon sa kauban nga pulis nga si PSSg Sheila Mae Conoman, ang Women and Children Protection Desk investigator.
Gumikan anaa sa peligro ang sitwasiyon sa kauban nga pulis, gilayong giniyutralisa ang suspek hinungdan nga nahagba kini.
Dali sab nga gidala ang suspek sa Davao del Sur Provincial Hospital apan nakabsan kini sa kinabuhi.
Nasayran nga duna nay daghang mga reklamo batok sa suspek sa giingong pagpanghimas sa pipila ka mga babayeng menor nga anaa sud sa Balay Ampunan nga nahimutang sa Barangay Dulangan, Digos City.