MISAAD ang pamunoan sa Palma Perez Elementary School sa M'lang, Cotabato nga seguruhon nila nga mga ibaligya nga mga pagkaon sulod sa eskuwelahan masusi pag-ayo human nga nahitabo ang food poisoning sa 45 ka mga estudyante sa tulunghaan, Miyerkules, Mayo 24, 2023.

Gikanayon ni Principal Maria Elna Jontongco nga bisan kon kompiyansa sila sa ilang mga food vendors tungod kay niagi sila og food handling training, apan tungod sa nahitabo kinahanglan na nga susihon ang mga pagkaon nga ibaligya sa eskuwelahan.

Kahinumdoman nga giingong nakasinati ang 45 ka estudyante og pagpanakit sa tiyan, pagkalipong, pagsuka-suka ug pagkalipong pipila ka minuto human makakaon sa pinaypay nga saging nga gibaligya sa tulunghaan.

Matud ni M'lang Municipal Health Officer Dr. Jun Sotea base sa ilang pagtuki, nasayran nga imbis mogamit og asukal, tawas ang nabutang sa food vendor sa paghimo og pinaypay nga saging nga gikaon sa mga bata.

Grabeng kabalaka sa mga ginikanan, magtutudlo ug opisyal sa barangay sa nasinatian sa mga estudyante. Dali nga gidala sa mga nagresponde nga sakop sa Municipal Disaster Risk Reducation and Management Offic sa M’lang ngadto sa ospital ang mga estudyante aron matambalan.

Nanawagan si Barangay Perez Kapitan Edward Borromeo nga mokalma lang human nga grabe ang gikabalaka sa mga magtutudlo ug ginikanan sa hitabo. Nagpahinumdom ang kapitan nga importante sa maong sitwasiyon ang kooperasyon sa matag usa aron sa paghatag solusyon sa hitabo.

Nagtuo siya nga wala tuyoa sa vendor ang hitabo ilabi na nga pipila na ka tuig nga naninda kini sa maong tulunghaan.