Kinsa nila Brownlee, Clarkson?

Kinsa nila Brownlee, Clarkson?

Kinsa kaha ang pilion sa Gilas Pilipinas nga naturalized player alang sa kampanya niini sa umaabot nga FIBA Basketball World Cup, si Justin Brownlee o Jordan Clarkson?

Kon si Philippine Basketball Association (PBA) Board chairman Ricky Vargas lang ang pangutan-on, gusto niyang kuhaon sa Gilas Pilipinas ang duha ka mga magduduwa.

“You have a beautiful scenario when you have both,” pasabot ni Vargas nga napatik sa Spin.ph.

Apan posible ba kining mahitabo nga usa ra man ka naturalized player ang itugot sa matag nasod?

Sa suhestiyon ni Vargas, si Fil-Am Clarkson, kinsa usa sa mga pambato sa Utah Jazz sa National Basketball Association (NBA), maoy himuong naturalized player samtang si Brownlee paduwaon isip local player.

Gitumbok ni Vargas ang residency rule sa FIBA nga posibleng maoy makahatag og katumanan ning mao niyang plano.

Si Brownlee nagduwa sa PBA isip import sa Brgy. Ginebra Gin Kings gikan pa niadtong 2016.

Nakaduwa na sab kini sa Gilas Pilipinas isip naturalized player sa bag-uhay lang nahuman nga Southeast Asian Games sa Cambodia diin nabawi sa mga Pinoy ang basketball gold medal.

Matod ni Vargas nga nagdepende lang kining tanan sa lakang nga himuon sa Samahang Basketbol ng Pilipinas (SBP), ang governing basketball body sa nasod.

“It’s worth a try, di ba? Bakit hindi,” pasabot ni Vargas. “But the question is, is it possible? So that falls on the head of the SBP if that is possible.”

Ang FIBA World Cup nakatakda karong Agusto 25 hangtod Septiyembre 10, 2023 diin co-host ang Pilipinas kauban ang Japan ug Indonesia. (ESL)

Related Stories

No stories found.
SunStar Publishing Inc.
www.sunstar.com.ph