Brutal nga gi-knockout ni Filipino Virgel “Valiente” Vitor sa ika-1:23 minutos sa 2nd round si Thai Campee Phayom aron angkunon ang World Boxing Council (WBC) Asian Silver super featherweight title ning Huwebes, Mayo 25, 2023, sa Spaceplus Bangkok sa Thailand.

Si Vitor, 25, kinsa lumad nga taga Tagbilaran City ug numero unong boksidor sa PMI Bohol Promotion, nibuhi og makusog nga left cross aron deretsong tumbahon si Phayom.

Grabe ang pagkahagba ni Phayom ug nakuyapan kini nga nagkulob sa sawog.

Gitauran og oxygen si Phayom ug gigamitan kini og stretcher aron mapagawas sa ring alang sa mas dugang pagsusi sa ring physician.

Si Vitor, kinsa mao sab ang tag-iya sa World Boxing Organization (WBO) Oriental super featherweight belt, misaka sa 21-2, 14KOs nga rekord samtang si Phayom, 25, natagak sa 23-7, 15KOs nga baraha.

Sa 1st round, tataw nga natay-og sab ang kalibutan ni Vitor dihang naigo siya sa left hook ni Phayom.

Pagsugod sa 2nd round, niagresibo na og maayo ang kanhi ALA fighter nga si Vitor ug wala niya lung-i pag-ataki si Phayom hangtod nga iya kining napatumba.

Kauban ni Vitor sa Thailand ang iyang manager nga si Floriezyl Echavez-Podot, PMI Bohol Boxing Promotions officials, ug trainer/matchmaker Edito Villamor. (ESL)