Nakalikay na sab sa kuhit sa panamilit ang host Boston Celtics human nila gipabugnaw ang Miami Heat, 110-97, sa Game 5 sa Eastern Conference finals series sa National Basketball Association (NBA) ning Biyernes, Mayo 26, 2023 (PH time).
Ang kadaugan maoy nakapahak sa labaw sa Heat sa series, 3-2, ug nakapaamag sa paglaum sa Celtics nga makakulit og kasaysayan isip labing unang puwersa nga hingpit makabangon gikan sa 0-3 nga biya sa best-of-seven nga engkuwentro.
Gipangulohan ni Derrick White ang Celtics pinaagi sa iyang 24 puntos lakip na niini ang unom ka three-pointers, nihatag og 23 puntos si Marcus Smart samtang ningdugang og 21 puntos matag usa sila si Jayson Tatum ug Jaylen Brown.
“We’ve got to do whatever it takes to get a win,” matod ni White.
Sa sayong bahin sa 1st quarter, ang Celtics nakamugna og 14-0 run nga maoy naghatag kanila og 20-5 nga labaw ug niini pa lang puntoha, tataw nga nialisngaw na ang kadaugan alang sa defending Eastern Conference champions.
“It just says that our backs are against the wall and we’re sticking together and we’re competing at a high level to give ourselves a chance,” asoy ni Celtics coach Joe Mazzulla.
Ang Game 6 mobalik sa balwarte sa Heat, nga nagtinguha nga mahimong ikaduha pa lang nga No. 8 squad nga makasulod sa NBA Finals.
“We’re always going to stay positive, knowing that we can and we will win the series,” batbat sa lider sa Heat nga si Jimmy Butler. “We just have to close it out at home.”
Ning sangkaa, wala nakatilaw sa labaw ang Heat hangtod na sa katapusang gutlo.
Adunay higayon nga ning-aksyon og kainit ang opensa sa Heat apan padayong nagpauwan og three-point bombs ang Cetlics hangtod nga ningburot sa 24 puntos ang ilang labaw sa 4th quarter, 96-72.
Ning puntoha, tataw nga gidawat na sa Heat ang kapildihan ug nagtutok na lang sila sa pag-host sa Game 6 nga kombatihon karong Dominggo, Mayo 28, 2023.
“One game doesn’t lead to the next game,” asoy ni Heat coach Erik Spoelstra.
Ang Heat gipangulohan ni Duncan Robinson pinaagi sa iyang 18 puntos, nihatag og 16 puntos si Bam Adebayo, nidugang og 15 puntos si Haywood Highsmith samtang ningtunol og 14 puntos matag usa sila si Jimmy Butler ug Caleb Martin. (AP)