Usa sa mga suspek sa pagpatay sa usa ka call center agent pasado alas 6 sa Huwebes sa gabii, Mayo 25, sa Sitio Colveta, Brgy. Mambaling, dakbayan sa Sugbo nadakpan sa kapulisan pipila ka oras human sa krimen.

Ang biktima giila nga si Redjie Kyle Nacar Barquero, 28, taga Brgy. Dumlog, dakbayan sa Talisay, kinsa dunay warrant of arrest sa usa ka kaso.

Matod ni Police Major Beethoven Taneo, hepe sa Mambaling Police Station sa Cebu City Police (CCPO), nga samtang sakay sa pasaheroang e-trike ang biktima gikan sa Seaside Alumnos, lugar sa iyang ugangan, ug padung sa Tabada Market aron didto mosakay og taxi paingon sa iyang trabahoan, duha ka mga lalaki kalit nga ningbutho ug gipusil ang biktima sa ulo ug lawas.

Human sa hitabo, dali nga ningsibat ang mga killer paingon sa Colveta II, Brgy. Mambaling, dakbayan sa Sugbo.

Dali nga ningresponde ang mga polis sa Mambaling sa dapit nga nahitaboan.

Nakadawat sila og impormasyon sa mga tawo nga dunay nakit-ang tawo nga armado duol sa dapit nga nahitaboan.

Dali nila kini nga girespondehan ug malampuson nila nga nadakpan ug ilang nasayran nga usa kini sa gitumbok nga suspek sa pagpusil patay kang Barquero.

Wala lang una nganli ni Taneo kinsa ang suspek sanglit duna pa silay gihimo nga follow-up operation, ilabi na sa kauban niini.

“Dili lang sa namo nganlan, Sir, kay ongoing pa among imbestigasyon. Nakuha na nato ang armas nga posibling maoy gigamit sa pagpusil aning biktima,” matod ni Taneo.

Gipaubos sa tactical investigation ang suspek ug nanghinaot ang kapulisan nga duna silay makuha nga kasayuran.

Gitug-an ni Taneo nga kanhi binilanggo ang biktima ug daghang mga kaso ang giatubang niini, sama sa ilegal nga drugas, illegal possession of firearms, estafa ug frustrated homicide.