Igsuong babaye patay sa ‘kulata’

Igsuong babaye patay sa ‘kulata’

Namatay ang usa ka 44-anyos nga dalaga nga nag-antos sa sakit nga Autism Spectrum Disorder human giingong kulataha sa iyang manghod nga lalaki sa ilang balay sa Gentlepeace Subdivision, Barangay Lawaan, dakbayan sa Talisay alas 10 sa Huwebes sa gabii, Mayo 25, 2023.

Ang biktima giila nga si Lugela Geraldez Morales, kinsa nakaangkon og kadaot sa ulo ug kalawasan tungod sa giingong pagsukmag sa makadaghan sa iyang manghod nga si Levan Geraldez Morales, 42, ulitawo, usa ka fabricator.

Sa imbestigasyon sa kapulisan sa dakbayan sa Talisay, ilang nasayran gikan sa inahan sa biktima ug suspek nga nagsugod ang hitabo sa dihang niabot si Levan nga hubog ug gihapak ang abaga sa biktima.

Tungod sa disorder ni Lugela, nasinggitan kini sa biktima ug nakabuhi og sakit nga mga estorya ngadto kang Levan nga gikasuko pag-ayo sa suspek.

Tungod sa grabeng kasuko, gibira sa suspek ang iyang maguwang babaye hangtod nga natumba sa sementadong sawog sa sulod sa ilang balay ug dayong sumbag sa makadaghang higayon sa nawong niini.

Giingong wa undangi sa suspek hangtod nga wala na maglihok nga nagbuy-od sa sawog.

Dali nga nanawag ang mga kabanay og medical team sa dakbayan sa Talisay ug gisuwayan pagtabang.

Tungod kay wala na maulii sa panimuot, gidali kini pagdala sa Talisay District Hospital diin didto giingong namatay ang biktima.

Nadakpan hinuon sa mga polis ang suspek, kinsa mag-atubang og kasong parricide sa korte.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph