Agi’g pagpangandam sa Cebu Port Authority (CPA) sa posibleng epekto sa bagyo sa kadagatan, gimando niini ang 24-oras nga pag monitor sa mga personnel sa tanang pantalan sa probinsya sa Sugbo.
Sa giluwatang pamahayag sa CPA pinaagi ni Maryknoll Bolasa, information officer sa buhatan sa Mayo 25, 2023, gipahibawo niini nga gi-activate na nila ang CPA Incident Command System.
Gimandoan usab ang tanang port managers ug harbor masters sa pagsusi sa ilang mga anchorage area ug kinahanglan nga makig-alayon sa Philippine Coast Guard (PCG) Cebu aron kalikayan ang di maayong mga hitabo sa kadagatan.
Matod ni Bolasa nga dili nila gusto nga mahitabo ang halapad nga kadaot sa pantalan susama sa milabay nga bagyo sa 2021.
“The devastation experienced during the landfall of super typhoon Odette that hit Cebu in 2021 still bears scars of its destructive power. Several vessels run aground, capsized, sank and port facilities were damaged in the Port of Cebu,” pahibawo niini sa Mayo 25, 2023.
“As the path of super typhoon is unpredictable, the Cebu Port Authority (CPA) have put in place various measures to prevent casualties, property damage and ensure speedy resumption of port operations,” dugang niini.
Atol ning pagsuwat, gipahibaw ni Bolasa nga wala pay mga biyahe nga gikanselar.
Apan ugaling dunay kausaban, gipahibawo sa CPA nga gimando ang pagpahigayon og preemptive evacuation sa tanang mga pasahero sa tanan nga mga pantalan.
Di na usab pwede mosulod ang bisan kinsang sakyanan o mga tawo sa pantalan sa maong higayon gawas lang kon dunay emerhensya. Paagi kini nga dili makababag o makahasol sa operasyon sa sulod.
Gipahinumdoman usab ang mga nagduma sa pagpatangtang sa mga advertisement billboard aron malikayan ang disgrasya.
“In case that Tropical Cyclone Wind Signal No. 2 is raised, CPA shall immediately issue notice to all ports to automatically suspend all cargo handling operations at the anchorage...” matod niini.
Giawhag ni Bolasa ang tanang mga pasahero sa kanunay nga pag monitor sa updates sa CPA aron mahibawo sa kalamboan sa ilang mga scheduled nga biyahe.