Ang Registry of Deeds (ROD) gikatakdang moapud-apod sa 342 ka mga titulo sa mga benepisyaryo sa lungsod sa Malabuyoc karong adlawa, Mayo 27, 2023.

Si Atty. Ariel Condat, pangulo sa ROD-Cebu Province, nagkanayon nga kini pinasubay sa programa sa ilang buhatan nga “Gasa Ko, Titulo Mo” diin ang mga benepisyaryo nakabaton sa titulo sa ilang yuta nga way gasto.

Nahimong sayon ang pagpatitulo sa mga benepisyaryo human sila nakapresentar og free patent title nga kanhi giisyu sa Department of Environment and Natural Resources (DENR) ug giproseso ang ilang aplikasyon hinungdan sa paglusot sa ilang Transfer Certificate of Title.

Ang mga benepisyaryo nakadaginot og P2,000 ngadto sa P2,500 nga bayranan sa ROD ug nagpasayon pa sa ilang pag-angkon sa dokumento sa propiyedad nga ilang gipanag-iya gumikan sa libreng serbisyo.

“Tungod ani nga programa, dili na sila kinahanglan mag-comply aning dokumento. Ang ila na lang buhaton nga i-prove nga sila ang tag-iya aning maong yuta ug dili na sila mobayad og registration fees,” matod ni Condat.

Kauban ang Integrated Bar of the Philippines-Cebu Chapter, Office of the Vice President ug local government unit (LGU), napahigayon ang ilang programa nga gipahaom usab sa caravan of government services ni Cebu Governor Gwendolyn Garcia.

Si Condat nagkanayon nga ang iyang buhatan nakarehistro na og 3,164 ka mga titulo sa yuta gikan sa walo ka mga LGU sukad pa sa Nobiyembre 2022 diin ang mga benepisyaryo libre nga nakapahimulos sa serbisyo.

Sa maong gidaghanon, 622 ang hingpit nga na-claim sa mga tag-iya ug ang nahabilin mahimong makuha sa ROD nga nahimutang tupad sa edepisyo sa Office of the Ombudsman Visayas sa Department of Agriculture compound sa Barangay Capitol Site, dakbayan sa Sugbo.

Ang mga claimant giawhag sa pagdala sa ilang mga valid identification (ID) card ug kadtong gi-authorize sa pagkuha gikinahanglang dunay special power of attorney.