Gimando ni Badian Mayor Carmencita Lumain ang temporaryong pagpasira sa tanang tourism sites ug ingon man ang tourism activities sugod sa Mayo 27, 2023, Sabado.

Kini aron kalikayan ang di maayong mga insidente sa mga turista ilabi na kon ugaling masinati ang epekto sa bagyo sa Sugbo.

Sa giluwatang Executive Order No. 18 S. 2023 ni Lumain, gihimug-atan niya ang posible unya nga kadaot o pagsaka sa tubig sa dagat o waterfalls tungod sa bagyo.

Hinungdan nga nalakip sa gipangdid-an na sa pagpasulod og turista o bisita ang Kawasan Falls, Lambug Beach, Kandungaw Peak ug Osmeña Peak.

Gidili usab ang canyoneering, trekking, mountain climbing ug uban pang water activities.

Gipahibawo sa lungsod nga kon ugaling malantawan ang posibleng dakong epekto sa bagyo nga tawgon og Betty, magpadayon ang maong mando.