Uban sa plano sa Department of Education (DepEd) nga i-integrate ang mandatory scout movement sa iyang curriculum, ang Department of Health (DOH) sa Biyernes, Mayo 26, 2023, niingon nga maayong himuong bahin niini ang first aid training.

Sa bag-o lang nga media briefing, si Health Undersecretary Maria Rosario Vergeire niingon nga ang first aid training makonsiderar nga subject matter sa mandatory scouting subject.

“It is very important for lay persons to know how to give first aid, on what to do during medical emergency situations, such as CPR (cardiopulmonary resuscitation),” matod ni Vergeire. (Importante kaayo alang sa mga yanong tawo nga kahibawo kon unsaon ang paghatag og first aid, kon unsay buhaton sa mga panahon sa emerhensya nga medikal, sama sa CPR (cardiopulmonary resuscitation.)

“What we want is for every Filipino would know how to give first aid and other basic life support skills,” dugang niya. (Ang atong gusto kay ang matag Pilipino makahibalo unsaon paghatag og first aid ug uban pang batakang kahanas sa pagluwas og kinabuhi.)

Kon maaprobahan ang maong sugyot, ang opisyal sa panglawas niingon nga andam ang DOH nga moabag sa mga tunghaan.

“The DOH is ready to help DepEd and other sectors so that we can properly implement this program,” matod ni Vergeire. (Andam ang DOH nga motabang sa DepEd ug sa ubang sektor para maimplementar nato kini sa hustong paagi.)

Sayo ning buwana, si DepEd Secretary ug Bise Presidente Sara Duterte niingon nga nangita na sila og mga paagi sa pag-integrate sa mandatory scouting sa school curriculum.

Si Duterte niingon nga ang pagbuhat niini magtugot sa mga batan-ong Pilipino nga makakat-on gikan sa Scout movement values sama sa pagkamatinud-anon, integridad, pagtahod ug pagserbisyo sa uban. (HDT sa SunStar Philippines)