Editoryal: Mopakusog sa turismo

Editoryal: Mopakusog sa turismo

Dakong garbo nga ang Bohol, usa sa upat ka mga lalawigan nga naglangkob sa Central Visayas (CV), gideklarar sa United Nations Educational, Scientific and Cultural Organization (Unesco) isip una ug bugtong ‘global geopark’ sa Pilipinas atol sa 216th Unesco Executive Board Session sa Paris, France sa Miyerkules, Mayo 24, 2023.

Ang pagpangan og Unesco Global Geopark, nagsugod sa 2015, “recognizes geological heritage of international significance.

Kini nga bag-ong internasyonal nga dungog nga naangkon sa Bohol dili lang makatabang sa pagpanalipod ug pagpreserbar sa kinaiyahan sa isla sa mga Bol-anon, magdasig usab kini og dugang interes sa mga bisita o turista nga buot makakita ug masinati ang maanindot nga isla nga puno sa mga bahandi sa natural nga kabilin sa kasaysayan sa kalibutan.

Sa pagdagsa sa mga turista sa Bohol seguradong motakod sa iyang kasikbit nga mga lalawigan sa Sugbo, Siguijor ug Negros Oriental sa CV nga dunay managlahi usab nga katahom sa palibot ug susamang Bisaya nga pagkamahigalaon sa pag-alagad sa mga bisita, labi na sa mga langyaw.

Apan ang maong pasidungog sa Unesco gikaluhaan og dakong responsibilidad sa mga Bol-anon ug tanang katawhan sa CV.

Usa kini sa gipadayag ni Tagbilaran City Bishop Alberto Uy sa Biyernes, Mayo 26, 2023, nga isip labing unang Global Geopark sa Pilipinas, nagkinahanglan og dugang responsibilidad sa pag-atiman sa kinaiyahan nga gitahod sa katiguwangan sulod na sa kapin sa 150 milyunes na ka tuig.

Dugang sa obispo, ang internasyonal nga titulo nagpataas sa mga gilauman alang sa mga Bol-anon nga magpakita og dugang nga pag-atiman sa Inahan sa Yuta aron magpabilin ang pag-ila sa Unesco ug magpabiling bililhon ug masinati sa mosunod pang mga henerasyon.

Gawas pa, ang maong bahandi nga gasa sa Kahitas-an dunay katugbang nga ekonomikanhon nga kalamboan dinhing dapita sa nasod tungod sa gilauman nga mosamot pagkusog ang bul-og sa turismo. Salamat, Unesco.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph