Chinese national nga giingong nagselos aksidenteng nakapusil sa bana sa iyang kanhi kapuyo alas 10 sa buntag sa Biyernes, Mayo 26, sa kilid sa simbahan sa Alliance of Two Hearts, Banawa, Brgy. Guadalupe, dakbayan sa Sugbo.
Ang biktima nga samdan sa lubot mao si Gilbert Abiong, 35, taga Brgy. Bagacay, lungsod sa Sibonga.
Ang suspek nga wa pa madakpi giilang si Eugene Chan Lim, hingkod, Chinese national, taga R. Duterte Street, Banawa, Guadalupe.
Si Police Senior Master Sgt. Melvin Jimenez, imbestigador sa Gualdalupe Police Station sa Cebu City Police Office (CCPO) nga nahinabi sa Superbalita Cebu, nagkanayon nga si Abiong kuyog sa iyang asawa nga si Irish. Uban nila ang duha ka mga anak ni Irish ug sa suspek.
Gikan sila sa thanksgiving mass sa Alliance of Two Hearts alang sa anak nila ni Irish ug sa suspek, nga mo-graduate sa Mayo 27.
Matod ni Gilbert nga samtang siya diha sa driver’s seat, nanuktok si Lim nga armado sa bentana sa sakyanan.
Tungod sa iyang kahadlok nga pamusilon silang tanan, siya nigawas sa awto.
Apan sa kalit lang gipusposan sa suspek ang ulo sa biktima sa gidala nga armas niini.
Ang biktima nisukol, nag-inilugay sila sa armas ug sa pagbuto, naigo ang lubot ni Gilbert.
“Selos ang motibo nga atong gitan-aw sa krimen. Makita nato nga naglagot ang suspek kay duna baya silay duha ka mga anak sa asawa (Irish) sa biktima,” dugang ni Jimenez.
Si Irish nga nahinabi sa Superbalita Cebu nagkanayon nga lahi og batasan ang suspek apan iya gihapong gitagad tungod lang sa ilang mga anak.
Sumala pa niya nga gisultihan niya ang iyang bana nga di tagdon ang suspek kay lahi og taras.
Apan nabalaka ang iyang bana nga basin sila pamusilon maong nangabli.
Usa ka 11 anyos nga batang lalaki nga saksi ang nahinabi sa Superbalita Cebu, nagkanayon nga nag-ilis og sinina ang suspek human sa pagpusil dayong sibat.
Nisakay sa iyang sakyanan ang suspek ug daling nibiya sa dapit.
Sa pagsuwat ning taho, wa pa madakpi ang suspek. (GPL)