Upat ka mga sakop sa usa ka fraternity gipriso human giakusahang nangulata kay usa kanila nasukong gitutokan niadtong Huwebes sa ala 1:15 sa hapon, Mayo 25, sa Brgy. Cambuhawe, lungsod sa Balamban, Sugbo.
Ang biktima nga giilang si Agripino Seblos Mongosera, 18, ulitawo, taga Sitio Calagitan, Brgy. Buanoy, lungsod sa Balamban, nalandig sa tambalanan human nakaangkon og grabing bun-og sa nagkadaiyang bahin sa lawas.
Ang mga suspek giilang sila si Kyle Jake Basbas Abadinas, 22, taga Sitio Lomboy, Balamban ug mga silingan nga sila si Brandon Jay Saga Pacquiao, 21; ug Bernie Sarsalejo, Jr.’ 22.
Ni-surrender sa Biyernes sa udto, Mayo 26, ang ikaupat nga suspek nga si Kenneth Basbas Abadinas.
Ang upat pulos mga sakop sa Tau Gamma Phi fraternity.
Si Police Lt. Col. Glenn Hife, hepe sa Balamban Police Station nga nahinabi sa Superbalita Cebu, nagkanayon nga si Mongosera gitabangan sa pagkulata sa mga suspek sulod sa Cambuhawe Spring.
Matod niya nga si Mongesera naligo sa swimming pool uban sa iyang mga higala.
Ang usa sa mga suspek nga si Kenneth naligo sab uban sa mga barkada.
Giingong nakainom ang grupo sa mga suspek sa wa pa ang hitabo.
“Nasuko ni si Kenneth kay gitutokan daw siya sa biktima. Wala makauyon sa pagsige’g tan-aw, iyang gisumbag,” dugang ni Hife.
Ang mga kauban ni Kenneth nga nakakita giingong ningtabang sab sa pagkulata sa biktima.
Grabing bun-og ang naangkon ni Mongosera tungod kay gibunalan sa mga suspek og palo-palo ang nawong.
Hinuon positibong nailhan sa biktima ug mga saksi ang mga suspek hinungdan nga ang tulo nasikop sa follow-up operation.
Si Kenneth nitahan sa Balamban Police Station kauban ang inahan.
Kasong serious physical injury ang gipasaka batok sa mga suspek nga natanggong pa sa Balamban Police Station samtang si Mongosera gikatahong nakagawas na sa tambalanan. (GPL)