Wa na ko nakakita og post sa Sugbo Bike Lanes Board ug wa na say mga netizen nga ning-post kalabot sa pagpanakop sa mga nagbiseklita nga nakalapas sa bike lanes ordinance. Basin wa na sila nipadayon una tungod sa di maayong reaksyon sa publiko, labina sa mga nagbiseklita nga nag bike to work nga gipanakop.
Tinuod, inay ganahan kang mag bike, di ka na lang motindak kay mabalaka kang makalapas, labina sa pagpasubay nimo sa bike lane. Pastilan challenge kaayo ni sa mga siklista tungod sa atoang mga drayber sa kadalanan nga magpataka lang og park ug hunong.
Hangtod nga di pa mahawanan ang mga dalan sa obstruction lisod, ipatuman ang pagpasubay sa mga siklista sa lanes. Kon dunay 60 ka patrollers, unya abagan og traffic enforcers, tingali ang tibuok stretch sa bike lanes sa Cebu City ilang ma-cover.
Iprayoridad ang mga dan nga kanunay agian sa mga nag bike to work, sama sa P. del Rosario ug V. Rama Avenue. Kani nga mga karsada maoy kanunay nakong nabantayan nga agianan sa mga nagbiseklita.
Tutokan ning mga dapita aron makat-on sa pagtuman ang mga tawo nga nanag-iya o nag drive og sakyanan.
KALAPASAN
Kay bisan unsaon, bisan pa og wa ang bike lanes ordinance, di man mahimo ning parkingan ning mga dalana kay national highways man ni. Sala usab ni sa nangaging mga administrasyon sa Cebu City kay wa napatuman ang traffic rules.
Di lang sa usa ka pamilok o tuhiktuhik nga pagpatuman sa balaod sa karsada ang gikinahanglan kon di, consistency. Kanang kanunay ang pagpatuman aron madugayan mausab ang batasan sa mga tawo nga naanad sa paglapas sa balaod trapiko.
Kon himuon ni sa tibuok semana, kanang pito ka adlaw sulod sa pipila ka mga buwan, seguradong dunay resulta.
Apan kon di consistent ang pagpatuman, kana di ka makapaabot og maayong resulta. Ang mga tigpatuman lang ang bantayan sa mga malapason.
ANAM-ANAM
Naa koy sugyot alang sa Board. Unaha ang pagdisiplina sa mga siklista nga mang counterflow ug kanang nangaanad sa pag-agi nga sugat bisan one-way ang karsada. Apila og dakop ang kanang molabang sa mga intersection bisan naa sa habig sa stop.
Kana wa na silay mahimo niana kay klaro kaayo nang kalapasan sa balaod sa karsada.
Sunod nga ipatuman ang pugsanay nga pagpasul-ob og helmet ug pagbutang og labing minos usa ka blinker sa biseklita ug kon makaya, apilon ang likod sa helmet alang sa mas maayong visibility sa mga drayber sa mga sakyanan nga nagsunod.
Barato ra baya nang blinkers but mas maayo kon makatabang ang Siyudad ug private sector sa pagpalit aron ihatag ngadto sa di makasarang sa pag-angkon niini.
Inay dakpon, hatagan una niini dala ang warning nga kon di niya gamiton ang helmet ug itaod ang blinker, dakpon na siya sa sunod higayon. Inay nga pangdakpon diretso ug ipang impound ang biseklita, warning lang una ug tabangan nga makatuman og seguro sa balaod.
Mao na ang gisaway sa netizens kay kabos na gani, pit-on pa sa mga multa. Nagbiseklita sila aron makadaginot sa pletihan. Huna-hunaa kon pila ang magasto sa usa ka trabahante nga magbalhinbalhin og sakay sa labing minos duha ngadto sa unom ka mga sakyanan sa matag adlaw.
Apan kon magbiseklita, way bisan usa ka sentimong mataktak sa bulsa.