Human sa lain nilang makabungog nga kadaugan sa Game 5, kalit nga nausab ang trending sa series tali sa Miami Heat ug Boston Celtics sa NBA Eastern Conference Finals.
Naglabaw pa man tuod og 3-2 ang Heat, pero sa dagan sa serye di nato ikalimod nga ang kasaysayan atoa dap-ig sa Boston.
Kini gumikan kay sa 150 ka best-of-seven playoffs nga ang team nabiyaan og 0-3, wa pay nakabangon sa series.
Ug ang Boston, base sa ilang gipakita sa Games 3 ug 4, maoy anaa karon sa posisyon nga mobuak ning makasaysayong record.
Ning 150 nga nahisgutan sa unahan, 136 niini gitapos lang sa Games 5 or paubos.
Buot pasabot, 90% sa mga teams nga nabiyaan 0-3 sa series mas dali ra nga gi-knockout kon itandi sa Celtics.
Sa kasaysayan, halos tanang teams nga nabiyaan, 3-0, sa series di maka 3-2.
Pero ang 2-3 nga sitwasyon dili bag-o sa Boston. Gani nahitabo kini nila batok sa Philadelphia Sixers sa miaging semis playoffs.
Nabuhat usab ni nila sa miaging tuig batok sa Milwaukee Bucks.
Hinuon nasubay usab sa kasaysayan nga katulo ra ka serye nahitabo nga ang 3-0 nga bintaha sa series naabot sa Game 7.
Niadtong 2003 ang Portland Trailblazers human mabiyai og 3-0 sa series, nakaabot pa gyud sila og Game 7 sa first round apan napildi sa Dallas.
Sa second round sa 1994, ang Denver Nuggets hapit makabangon sa susamang sitwasyon apan gilupig sila sa Game 7 sa Utah Jazz.
Nahitabo usab kini sa New York Knicks kinsa gipildi sa Rochester Royal sa NBA Finals sa 1951.
Karong buntag sa alas otso sa Dominggo (oras sa Pilipinas) mosuway ang Boston pagkulit og kasaysayan isip unang team nga nabiyaan og 3-0 sa series apan nakabawi og mao pa ang maka host sa Game 7.
Ug dili kini halayo sa tinuod kay kon ang intensity level sa ilang uwahing duha ka duwa mao gihapon ang mopatigbabaw, hataas usab ang porsiyento sa ilang kadaugan.
Apan batok sa Miami Heat, mahimong makutas nga dalan ang ilang sagubangon kay kita sayod sa kapabilidad usab sa Miami ilabi na og anaa kini sa ilang korte.