Mga habalhabal giawhag sa pagparehistro sa ride-hailing

Ang mga motorcycle-for-hire o “habal-habal,” giawhag sa usa ka opisyal sa pag-apil sa mga accredited nga ride-hailing operators aron masiguro nga andam sila kon ang gobyerno mag-regulate sa ilang operasyon.

Si Eduardo Montealto Jr., direktor sa Land Transportation Franchising and Regulatory Board (LTFRB 7), niingon nga kini aron usab maseguro nga makapasar sila sa gikinahanglang pagbansaybansay sa dili pa mopasakay og mga pasahero.

“Soon enough when they are regulated, we will be able to implement TNVS,” matod niya sa interview sa SunStar Cebu niadtong Biyernes, Mayo 26, 2023.

Ang TNVS, o transportation network vehicle service, mao ang mga unit nga nahisakop sa akreditado nga ride-hailing operator.

Matod niya nga sa pagkakaron, adunay tulo ka accredited nga ride-hailing operators, nga naglangkob sa Angkas, Joyride, ug Move It, diin mahimong mosalmot ang mga habalhabal rider.

Sa pangutana kon duna ba silay ideya kon pila ang mga habal-habal sa rehiyon, ang LTFRB 7 niingon nga dili sila makahatag og mga numero sanglit wala pa kini gi-regulate.

REGULATE

Matod ni Montealto, gikinahanglan ang pag-regulate sa mga habal-habal aron masiguro ang kaluwasan sa kadalanan, ilabina samtang nagkarga og mga pasahero.

Matod niya nga ang mga rider kinahanglang mopailalom sa road safety seminars ug eksaminasyon, nga gikinahanglan kon moapil sa ride-hailing operator.

“Kining mga accredited nga ride-hailing operators naay mga training, labi na kon unsaon pagdrayb kon magkarga og pasahero,” ingon niya.

Matod niya nga usa usab kini ka paagi sa pag-regulate sa plitehan sa mga sakay tungod kay kanunay nga taas ang taripa sa habalhabal.

Siya niingon nga tungod kay ang tanan nga mga pagbiyahe natala ug masubay, maghatag usab kini og dugang nga proteksyon sa mga pasahero.

“Ang mga drayber mismo ang nakarehistro, dili lang ang ilang mga motorcyle-taxis. Regulado gyud sila, ug dili sila makamaneho og mga sakyanan nga dili rehistrado kanila,” matod ni Montealto.

Matod niya nga kasamtangang nakig-alayon ang ilang buhatan sa ubang mga buhatan sa road sector aron maporma ang Motorcycle-Taxi Technical Working Group (MT-TWG) nga mo-regulate sa dili madugay sa mga motorcycle-taxi riders.

Gawas sa LTFRB, ang technical working group naglakip sa Land Transportation Office, Highway Patrol Group sa Philippine National Police, ug mga ride-hailing players.

Samtang ang Kongreso wala pa mag-amendar sa Republic Act 4136, o nailhan nga Land Transit and Traffic Code, nga nagtugot lamang sa mga sakyanan nga adunay upat ka ligid ug pataas alang sa pampublikong transportasyon, ang grupo nagtrabaho sa usa ka administratibong regulasyon. (KJF)